விஜயபாஸ்கர் தொடர்புடைய இடங்களில் லஞ்ச ஒழிப்புத் துறை அதிரடி சோதனை
முன்னாள் அமைச்சர் சி.விஜயபாஸ்கருக்கு தொடர்புடைய 43 இடங்களில் லஞ்ச ஒழிப்புத் துறை அதிரடி சோதனை நடத்தி வருகிறது.
சென்னையில், விஜயபாஸ்கருக்கு தொடர்புடைய பல்வேறு இடங்களில், லஞ்ச ஒழிப்பு சோதனை நடந்து வருகிறது. விஜயபாஸ்கருக்கு சொந்தமான கீழ்பாக்கம் விஜய்சாந்தி அப்பார்ட்மெண்ட்ஸில் உள்ள வீடு மற்றும் தியாகராய நகர் பாகீரதி அம்மாள் தெருவில் உள்ள வீட்டில் சோதனை நடந்து வருகிறது. இதேபோல், நுங்கம்பாக்கம் எலைட் எம்பயரில் சின்னத்தம்பி பெயரில் உள்ள வீடு, நந்தனம் சேமியர்ஸ் சாலை ராகா குடியிருப்பில் உள்ள சரவணனின் வீட்டிலும் விஜயபாஸ்கரின் உதவியாளர் சீனிவாசனின் வளசரவாக்கம் பெத்தானிய நகர் வீட்டில் சோதனை நடக்கிறது. மந்தைவெளி பிஎஸ்என்எல் அலுவலகம் அருகே ஸ்ரீவாரி ஸ்டோன்ஸ் பிரைவேட் லிமிடெட் அலுவலகம், பெசன்ட் நகரில் உள்ள அன்யா என்டெர்பிரைசஸ் ஆகிய 7 இடங்களில் லஞ்ச ஒழிப்புத் துறை சோதனையிட்டு வருகிறது.
புதுக்கோட்டை மாவட்டம்- 23 இடங்களில் சோதனை: இலுப்பூர் குவாரி உள்ளிட்ட இடங்களில் சோதனை
முன்னாள் அமைச்சர் விஜயபாஸ்கரின் புதுக்கோட்டை வீடு, இலுப்பூரில் உள்ள குவாரி, அவர் தொடர்புடைய நபர்களுக்கு சொந்தமான இடங்கள் உள்பட 23 இடங்களில் லஞ்ச ஒழிப்புத் துறை சோதனை நடத்திவருகிறது. விஜயபாஸ்கரின் பினாமி எனக்கூறப்படும் காண்ட்ராக்டர் சோத்துப்பாறை முருகேசன், அதிமுக நகரச் செயலாளர் பாஸ்கர் மற்றும் அவரது சகோதரர் பாபு, நகர்மன்ற துணைத் தலைவர் சேட், கல்வி நிலையம் நடத்தி வரும் தனசேகரன் ஆகியோருக்கு சொந்தமான இடங்களில் சோதனை நடந்து வருகிறது. புதுக்கோட்டை மாவட்டத்தில் மட்டும் 23 இடங்களில் லஞ்ச சோதனை நடக்கிறது. காலை முதலே, நூறுக்கும் மேற்பட்ட அதிகாரிகள் சோதனை நடத்திவருவது குறிப்பிடத்தக்கது.
விஜயபாஸ்கர் மாமனாரின் கோவை வீட்டில் ரெய்டு - 5 பேர் கொண்ட அதிகாரிகள் சோதனை
கோவையில் உள்ள விஜயபாஸ்கர் மாமனார் வீட்டில், காலை முதல் லஞ்ச ஒழிப்புத் துறை சோதனை நடத்தி வருகிறது. கோவை நஞ்சுண்டாபுரம் சாலை எஸ்.என்.வி கார்டன் பகுதியில் உள்ள விஜயபாஸ்கரின் மனைவி ரம்யாவின் தந்தை வீடு உள்ளது. போலீஸ் பாதுகாப்புடன், காலை 6 மணிக்கு அங்கு சென்ற பெண் அதிகாரி உள்பட 5 பேர் கொண்ட லஞ்ச ஒழிப்புத் துறையினர், சோதனை நடத்தி வருகின்றனர். விஜயபாஸ்கர் கோவை செல்லும் போது, அந்த வீட்டில் தங்குவது வழக்கம் என கூறப்படும் நிலையில், லஞ்ச ஒழிப்புத் துறையினர் சோதனை நடத்தி வருகின்றனர்.
விஜயபாஸ்கர் சகோதரி தனலட்சுமி வீட்டில் ரெய்டு - தமிழக அரசுக்கு அதிமுகவினர் கண்டனம்
விஜயபாஸ்கரின் சகோதரியான பல் மருத்துவர் தனலட்சுமியின் வீடு மற்றும் மருத்துவமனையில் லஞ்ச ஒழிப்புத்துறையினர் சோதனை நடத்தி வருகின்றனர். செங்கல்பட்டு மாவட்டம் கல்பாக்கம் அருகே உள்ள புதுப்பட்டினம் அரேபியன் கார்டனில் மருத்துவர் தனலட்சுமியின் வீடு உள்ளது. சோதனை நடைபெறும் அங்கு வந்த அதிமுகவினர் 50க்கும் மேற்பட்டோர், தமிழக அரசையும், லஞ்ச ஒழிப்புத் துறை போலீசாரையும் கண்டித்து முழக்கம் எழுப்பினர்.
விஜயபாஸ்கர் அண்ணன் உதயகுமார் வீட்டில் ரெய்டு - நேர்முக உதவியாளர் குருபாபு வீட்டிலும் சோதனை
திருச்சி எடமலைப்பட்டி புதூரில் உள்ள விஜயபாஸ்கரின் அண்ணன் உதயகுமார் வீட்டில் லஞ்ச ஒழிப்புத் துறை சோதனை நடத்தி வருகிறது. தலைநகர் சென்னை முதல் மாநிலத்தின் பல்வேறு பகுதிகளில் ஒரே நேரத்தில் சோதனை நடத்தி வரும் லஞ்ச ஒழிப்புத் துறை, திருச்சியிலும் களமிறங்கியுள்ளது. திருச்சி அன்பு நகரில் உள்ள விஜயபாஸ்கரின் நேர்முக உதவியாளரான குருபாபுவின் வீட்டிலும், லஞ்ச ஒழிப்புத் துறை டிஎஸ்பி மணிகண்டன் தலைமையில், சோதனை நடந்து வருகிறது.
கல்விக் குழும உரிமையாளர் வீட்டில் ரெய்டு - தனசேகரன் வீட்டில் சோதனையால், பரபரப்பு
புதுக்கோட்டை மாவட்டம் ஆலங்குடியில் சுபபாரதி கல்விக் குழும உரிமையாளர் தனசேகரன் வீட்டில் லஞ்ச ஒழிப்புத் துறை சோதனை நடத்தி வருகிறது. முன்னாள் அமைச்சர் விஜயபாஸ்கரின் ஆதரவாளரான தனசேகரனுக்கு, ஆலங்குடி அடுத்துள்ள கைக்குறிச்சியில், பி.எட். கல்லூரி, பொறியியல் கல்லூரி, கலை அறிவியல் கல்லூரி நடத்தி வருகிறார். கல்வி நிறுவனங்கள் மற்றும் தனசேகரனுக்குச் சொந்தமான சொத்துக்கள் குறித்த ஆவணங்களை பரிசோதித்து வருவதால் மேலும் சில இடங்களில் சோதனை நடைபெறக்கூடும் எனக் கூறப்படுகிறது.