தமிழகம் முழுவதும் பல்வேறு பகுதிகளில் கனமழை - பொதுமக்கள், விவசாயிகள் மகிழ்ச்சி

சென்னையில் திருவான்மியூர், அடையார், பெசன்ட் நகர், அண்ணா சாலை , மெரினா, வேளச்சேரி, தரமணி,ஆலந்தூர் ஆகிய இடங்களில் சுமார் ஒரு மணி நேரத்திற்கு மேலாக காற்றுடன் கூடிய கனமழை கொட்டித் தீர்த்தது. இதனால் சாலைகளில் வெள்ளம் கரைபுரண்டு ஓடியது.

திருவள்ளூர் மாவட்டத்தில் பொன்னேரி, செங்குன்றம், பெரியபாளையம், மீஞ்சூர், சுற்றுப்பகுதிகளில் இரவில் பலத்த காற்றுடன் கூடிய கனமழை பெய்தது. 

திருவள்ளூர் மாவட்டம் பூந்தமல்லி, மாங்காடு, குன்றத்தூர், போரூர், ஐயப்பன்தாங்கல், நசரத்பேட்டை உள்ளிட்ட பகுதிகளில் பெய்த கன மழையால் சாலைகள் மற்றும் தெருக்களில் மழைநீர் பெருக்கெடுத்து ஓடியது.

நாமக்கல் மாவட்டம் திருச்செங்கோடு மற்றும் அதன் சுற்றுவட்டார பகுதிகளில்  பெய்த மிதமான மழையால் விவசாயிகளும், பொதுமக்களும் மகிழ்ச்சி அடைந்தனர்.

கன்னியாகுமரி மாவட்டத்தில் கடந்த 3 தினங்களாக அவ்வப்போது இரவிலும் பகலிலும் கனமழையும் மிதமான மழையும்  பெய்து வருகிறது. இதனால் அணைகளில் நீர்மட்டம் வெகுவாக உயர்ந்து வருகிறது.

நாகை, வேளாங்கண்ணி உள்ளிட்ட பகுதிகளில் சுமார் நான்கு மணி நேரமாக பெய்த கனமழையால் மழைநீர் ஆங்காங்கே தேங்கியது. காரைக்கால் மாவட்டத்தில் திருநள்ளார், அம்பகரத்தூர், திருப்பட்டினம் உள்ளிட்ட பகுதிகளில் நல்ல மழை பெய்தது.

திருவாரூர் மாவட்டத்தில் விளமல், வாழ வாய்க்கால்,   நன்னிலம் உள்ளிட்ட பகுதிகளில் பரவலாக நல்ல மழை பெய்தது. குறுவை சாகுபடிக்கும் இந்த மழை பயனுள்ளதாக இருக்கும் என விவசாயிகள் மகிழ்ச்சி அயடைந்தனர். 

கொடைக்கானல் : 

கொடைக்கானல்  மற்றும் சுற்றுவட்டார பகுதிகளில் சாரல் மற்றும் மிதமான மழை பெய்தது. இதனால் நீர் ஆதாரங்கள் வெகுவாக உயர்ந்து வருகின்றன. 

திருப்பத்தூர் மாவட்டம் வாணியம்பாடி சுற்றியுள்ள செட்டியப்பனூர், ஆலங்காயம் நிம்மியம்பட்டு, ஜனதாபுரம் உள்ளிட்ட பகுதிகளில் கனமழை பெய்தது. இதனால்  விவசாயிகள் மற்றும் பொதுமக்கள் மகிழ்ச்சி அடைந்தனர்.