தமிழகத்தில் பல்வேறு மாவட்டங்களில் பரவலாக மழை

வடகிழக்கு பருவமழை துவங்கியது முதல் கடலூர் மாவட்டத்தில் விட்டு விட்டு சீரான இடைவெளியில் மழை பெய்து வருகிறது. இந்நிலையில் இன்று அதிகாலை 3 மணி முதல் கடலூர் மற்றும் சுற்றுவட்டார பகுதிகளில் தொடர்ந்து கனமழை பெய்தது. விருத்தாசலம், நெய்வேலி, பண்ருட்டி, சிதம்பரம், காட்டுமன்னார்கோயில் என பரவலாக பெய்து வரும் இந்த மழை விவசாயிகளுக்கு பயன் அளிக்கும் என எதிர்பார்க்கப்படுகிறது. அதே நேரத்தில், கனமழை காரணமாக பொதுமக்களின் இயல்பு வாழ்க்கையும் பாதிக்கப்பட்டுள்ளது.

திருவாரூர் மற்றும் அதன் சுற்றுவட்டார பகுதிகளான நன்னிலம், குடவாசல், கொரடாச்சேரி, மாவூர், அடியக்கமங்கலம், ஆகிய பகுதிகளில் நேற்று இரவு முதல் தொடர்ந்து மழை பெய்து வருகிறது. இரவு முதல் பெய்த மழையால் சாலையில், வெள்ளம் போல் தண்ணீர் தேங்கியது. கடந்த சில நாட்களாக, வெப்பம் தாக்கி வந்த நிலையில், இந்த தொடர் மழையால் வெப்பம் தணிந்து குளிர்ச்சி நிலவியது. இதனால் பொதுமக்கள் மகிழ்ச்சி அடைந்துள்ளனர்.