விளையாட்டு திருவிழா 03.09.2018 - 18வது ஆசிய விளையாட்டு போட்டி

டெஸ்ட் தரவரிசையில் நம்பர் 1 இடத்தில் உள்ள இந்திய அணி, இங்கிலாந்துக்கு எதிரான தொடரை இழந்தது. இங்கிலாந்தை காட்டிலும் பலம் வாய்ந்த அணியாக கருதப்படும், இந்திய அணி தோல்வி அடைந்ததற்கு முதல் காரணம் தொடருக்கு முன் போதுமான பயிற்சி போட்டியில் பங்கேற்காமல் இருந்தது தான். ஆஸ்திரேலியா, இங்கிலாந்து போன்ற அணிகள் வெளிநாட்டுக்கு சுற்றுப்பயணம் மேற்கொள்ளும் போது குறைந்தது 2 பயிற்சி ஆட்டங்களில் பங்கேற்கும். ஆனால் இந்திய அணியோ பயிற்சி ஆட்டத்தால் எந்த வருமானமும் கிடைக்காது என்பதால் ஒரு பயிற்சி ஆட்டத்தில் மட்டும் தான் விளையாடுகிறது.

பொதுவாக இந்திய அணியின் பலமாக பேட்டிங் கருதப்படும். ஆனால் சமீப காலமாக இந்தியாவின் வேகப்பந்து வீச்சு அசுர பலத்துடன் உள்ளது. இங்கிலாந்து வீரர்களின் விக்கெட்டுகளை இந்திய பந்துவீச்சாளர்கள் வீழ்த்தினாலும், வெற்றி வாய்ப்பை பறிகொடுப்பது பேட்ஸ்மேன்கள் மட்டுமே. டெஸ்ட் போட்டிக்கு மிகவும் முக்கியம் தொடக்க ஆட்டக்காரர்கள் தான். ஆனால் இங்கிலாந்து தொடரில் தவான், ராகுல், முரளி விஜய் என மூவரும் தொடர்ந்து சொதப்பி வருகின்றனர்.

இந்திய அணியின் நடுவரிசை வீரர்கள் பார்மில் இல்லாததும் முக்கிய காரணமாக கருதப்படுகிறது. ரஹானே, ஹர்திக் பாண்டியா மற்றும் ரிஷப் பண்ட் ஆகியோரும் மோசமான ஆட்டத்தை வெளிப்படுத்துவதால் வெற்றி அருகில் இருந்தும் இந்திய அணியால் எட்டமுடியவில்லை. சுழற்பந்துவீச்சை எளிதாக சமாளிக்கும் வல்லமை கொண்ட இந்திய பேட்ஸ்மேன்கள், மொயின் அலி பந்துவீச்சில் மட்டும் இந்த ஆட்டத்தில் ஒன்பது விக்கெட்டுகளை பறிகொடுத்துள்ளனர்.மேலும் இடுப்பு பகுதியில் ஏற்பட்ட காயத்திலிருந்து குணமடையாத அஸ்வினை அணியில் விளையாட வைத்ததும், ஜடேஜாவுக்கு தொடர்ந்து வாய்ப்பு மறுக்கப்பட்டதும் இந்திய அணி நிர்வாகம் செய்த மெகா தவறுகளில் ஒன்று. தொடரை இழந்த நிலையில் கடைசி போட்டியில் பிரித்திவ் ஷா , ஹிமன்சு ரானா,கருண் நாயர் போன்ற இளம் வீரர்களுக்கு வாய்ப்பு வழங்குவதே சரியான முடிவாக அமையும்.

அமெரிக்க ஓபன் டென்னிஸ் தொடரின் காலிறுதி  சுற்றுக்கு நடப்பு சாம்பியன் நடால் முன்னேறினார். நியூயார்க்கில் நடைபெற்ற நான்காவது சுற்று ஆட்டத்தில் ஜார்ஜியா வீரர் பசில்லாவை எதிர் கொண்ட நடால் 6க்கு 3, 6 க்கு 3, 6க்கு 7, 6க்கு 4 என்ற செட் கணக்கில் வென்று காலிறுதிக்கு முன்னேறினார். 

இதேபோல, அர்ஜென்டீன வீரர் மார்ட்டின் டெல் போட்ரோவும் காலிறுதி  சுற்றுக்கு முன்னேறினார். குரோசிய வீரர் கோரிச்சை அவர் வீழ்த்தி காலிறுதிக்குள் நுழைந்தார். 

இதனிடையே, மகளிர் ஒற்றையர் பிரிவு ஆட்டத்தில் அமெரிக்க வீராங்கனை செரினா வில்லியம்ஸ் காலிறுதி சுற்றுக்கு முன்னேறியுள்ளார். எஸ்தோனிய வீராங்கனை கான்பியை அவர் வீழ்த்தினார்.

இத்தாலி பார்முலா ஓன் கிராண்ட் பீரி கார் பந்தயத்தின் சாம்பியன் பட்டத்தை நட்சத்திர வீரர் ஹாமில்டன் கைப்பற்றினார். மோன்சா கார் பந்தய ஓடுதளத்தில் நடைபெற்ற இந்த சுற்றில் வீரர்கள் மின்னல் வேகத்தில் சீறிப் பாய்ந்தனர். 4 முறை உலக சாம்பியனும், ஜெர்மனி வீரருமான செபாஸ்டியன் விட்டல், தொடக்கத்தில் பின்தங்கி 18வது இடத்திற்கு தள்ளப்பட்டார். இருப்பினும் கடுமையாக போட்டியிட்டு அவர் 4 இடத்தில் பந்தயத்தை நிறைவு செய்தார். 306 கிலோ மீட்டர் கொண்ட பந்தய தூரத்தை 1 மணி நேரம் 16 நிமிடம் 54 விநாடிகளில் பிரிட்டன் வீரர் ஹாமில்டன் நிறைவு செய்து சாம்பியன் பட்டத்தை கைப்பற்றினார்.இதன் மூலம் உலக சாம்பியன்ஷிப் புள்ள பட்டியலில் 256 புள்ளிகளுடன் ஹாமில்டன் முதலிடத்திலும், 226 புள்ளிகளுடன் விட்டல் 2வது இடத்திலும் உள்ளார். இந்த சீசலில் இன்னும் 7 தொடர்கள் எஞ்சி உள்ளன. 

வருகின்ற ஒலிம்பிக் போட்டியில் டேபிள் டென்னிஸ் விளையாட்டில்  பதக்கம் வெல்வோம் என ஆசிய விளையாட்டுப் போட்டியில் இரண்டு வெண்கல பதக்கம் வென்ற தமிழக வீரர் சரத் கமல் தெரிவித்துள்ளார்.