தமிழகத்தின் பல்வேறு பகுதிகளிலும் ரம்ஜான் கொண்டாட்டம்...

திருப்பூர் நொய்யல் வீதி மாநகராட்சி பள்ளியில், தமிழ்நாடு தவ்ஹீத் ஜமாஅத் சார்பாக நடைபெற்ற சிறப்பு தொழுகையில் சிறுவர்கள், பெண்கள் உட்பட ஏராளமானோர் கலந்து கொண்டனர்.

இதேபோல், ரம்ஜான் பண்டிகையை ஒட்டி திண்டுக்கல் பேகம்பூர் பள்ளிவாசலில் நடைபெற்ற சிறப்பு தொழுகையில் ஆயிரக்கணக்கான இஸ்லாமிய பெருமக்கள் கலந்து கொண்டு ஒருவருக்கொருவர் வாழ்த்துக்களை பரிமாறிக் கொண்டனர்.

மேலும், தூத்துக்குடியில் உள்ள ஈத்கா திடலில் நடைபெற்ற சிறப்பு தொழுகையில் அரசு காஜி முஜிபுர் ரஹ்மான் கலந்து கொண்டார். உலக மக்கள் சுபிட்சமாக வாழ், நாடு வளம்பெற மழை வேண்டி சிறப்பு தொழுகை செய்யப்பட்டது. 

கடலூர் மஞ்சக்குப்பம் டவுன்ஹாலில், தமிழ்நாடு தவ்ஹீத் ஜமாத் அமைப்பு சார்பாக  சிறப்பு தொழுகைக்கு ஏற்பாடு செய்யப்பட்டிருந்தது. இந்த தொழுகையில் ஆண்களும், பெண்களும் நகர அரங்கில் கூடி தனித்தனியாக தொழுகையில் ஈடுபட்டனர். மேலும் ரம்ஜானின் சிறப்பு பற்றிய சொற்பொழிவும் இதில் நடைபெற்றது. 

ரம்ஜான் திருநாளை முன்னிட்டு மும்பையில் உள்ள ஹமிதியா மசூதியில் ஏராளமான இஸ்லாமியர்கள் கூட்டு தொழுகையில் ஈடுபட்டனர். சிறுவர், சிறுமியர், இளைஞர்கள், பெரியவர்கள் உள்ளிட்ட ஆயிரக்கணக்கானோர் புத்தாடை அணிந்து மசூதிக்கு வந்தனர். மசூதி மற்றும் அதை ஒட்டிய சாலை நெடுகிலும் அமர்ந்த இஸ்லாமியர்கள், அல்லாவை தொழுதனர். பின்னர் ஒருவரை ஒருவர் கட்டித் தழுவி அன்பையும், சமாதானத்தையும் பரிமாறிக்கொண்டனர். 

பீகார் மாநிலம் பாட்னாவில் உள்ள காந்தி மைதானத்தில் முதலமைச்சர் நிதிஷ்குமார் தலைமையில் நடைபெற்ற ரம்ஜான் சிறப்புத் தொழுகை கூட்டத்தில் ஏராளமானோர் பங்கேற்றனர். குழந்தைகளை தமது இருக்கையில் அமர வைத்த சிறிது நேரம் நின்ற அவர், இஸ்லாமிய மக்களுக்கு வாழ்த்து தெரிவித்தார். புத்தாடை அணிந்து வந்த சிறுவர், சிறுமியர் உள்ளிட்ட ஆயிரக்கணக்கானோர் நீண்ட வரிசையில் அமர்ந்து தொழுகையில் ஈடுபட்டது வண்ண மயமாக இருந்தது.  பின்னர், அவர்கள் ஒருவரை ஒருவர் கட்டித்தழுவி வாழ்த்துக்களை பரிமாறிக்கொண்டனர்.