வெள்ளை கம்பளம் போர்த்தியது போல் கொட்டும் இடுக்கி அணை நீர்

பெரியாறு ஆற்றின் கரையோர மக்களுக்கு வெள்ள அபாய முன்னெச்சரிக்கை விடப்பட்டுள்ளது. அணை திறக்கப்பட்டாலும் பெரியாறு கரையோரத்தில் உள்ள எந்த வீடுகளுக்கும் தண்ணீர் வராது என மாவட்ட நிர்வாகம் மதிப்பிட்டுள்ளது. முன்னெச்சரிக்கையாக பெரியாறு கரையோரம் உள்ள 79 குடும்பங்களுக்கு நோட்டீஸ் அனுப்பப்பட்டுள்ளது. முகாம்கள் தொடங்க 23 இடங்கள் கண்டறியப்பட்டுள்ளன. இடுக்கி, கஞ்சிக்குழி, தங்கமணி, வாத்திக்குடி, உப்புத்தோடு ஆகிய கிராமங்களிலும் அறிவிப்புகள் வெளியிடப்பட்டன. இடுக்கி அணை திறப்பின் ஒரு பகுதியாக, எர்ணாகுளத்தில் முன்னெச்சரிக்கை நடவடிக்கை எடுக்கப்பட்டுள்ளது. அனைத்து தாலுகாக்களிலும் நிவாரண முகாம்கள் அமைக்கப்பட்டுள்ளன. இடைமலையாறு அணையை திறக்க வேண்டிய நிலை ஏற்பட்டாலும், அனைத்து ஏற்பாடுகளும் செய்யப்பட்டுள்ளதாக மாவட்ட நிர்வாகம் தெரிவித்துள்ளது.தற்போதைய சூழ்நிலையில் கவலைப்பட தேவையில்லை என அமைச்சர் பி.ராஜீவ் தெரிவித்துள்ளார். தாலுகா அளவில் தயார் செய்யப்படும் முகாம்களில் உணவு உள்ளிட்ட வசதிகள் செய்யப்பட்டுள்ளன.மருந்துகளும் இருப்பு வைக்கப்பட்டுள்ளன. இப்பணியை ஒருங்கிணைக்க ஒவ்வொரு தொகுதியிலும் நோடல் அலுவலர்கள் நியமிக்கப்பட்டுள்ளனர். மக்கள் பிரதிநிதிகளுக்கு உரிய நேரத்தில் தகவல் தெரிவிக்க வாட்ஸ்அப் குழுக்கள் தொடங்கப்படும். சாலக்குடி ஆற்றில் நீர்வரத்து அதிகரித்துள்ளதால், கரையோரம் இருந்த மக்கள் வெளியேற்றப்பட்டனர். மேலும் இரண்டு நாட்களுக்கு அவர்கள் முகாமில் இருக்க அறிவுறுத்தப்பட்டுள்ளனர்.