ஹிப் ஹாப் தமிழா ஆதி யூடியூப் சேனல் முடக்கம் - வீடியோக்களை அழித்த ஹேக்கர்கள்

இசையமைப்பாளரும் நடிகருமான ஹிப் ஹாப் தமிழா ஆதியின் யூடியூப் சேனலை ஹேக்கர்கள் முடக்கியுள்ளனர். அடுத்தடுத்து பிரபலங்களின் சமூக வலைதள கணக்குகள் முடக்கப்படுவது, சினிமா வட்டாரத்தில் அதிர்ச்சியை ஏற்படுத்தியுள்ளது. பிரபலங்களின் இணைய கணக்குகள் முடக்கப்படுவது ஒரு கலாச்சாரமாகிவிட்டதோ என்று அஞ்சும் அளவிற்கு தொடர்ந்து பலரது இணைய கணக்குகளை ஹேக்கர்கள் முடக்கியுள்ளனர்பாஜக நிர்வாகியும், நடிகையுமான குஷ்புவின் டிவிட்டர் கணக்கு முடக்கப்பட்ட சம்பவம் பரபரப்பை ஏற்படுத்தியது. குஷ்புவின் பெயரை மாற்றி பிரையன் என்று பதிவிட்ட ஹேக்கர்கள், அவர் பதிவிட்டிருந்த பல ட்வீட்களை அழித்தனர். இதுகுறித்து டிஜிபி அலுவலகத்தில் குஷ்பு புகார் அளித்ததை தொடர்ந்து விசாரணை நடைபெற்று வரும் நிலையில், தற்போது இதுபோன்ற சூழலுக்கு தள்ளப்பட்டுள்ளார் இசையமைப்பாளரும், நடிகருமான ஹிப் ஹாப் தமிழா ஆதி..குஷ்புவின் கணவர் சுந்தர் சி இயக்கிய ஆம்பள படத்தின் மூலம் இசையமைப்பாளராக அறிமுகமான ஆதி, திரைக்கு வருவதற்கு முன்னரே சுயமாகவும், திரைப்படங்களிலும் பல ஹிப் ஹாப் பாடல்களை பாடி பிரபலமடைந்தார். சிவக்குமாரின் சபதம், அன்பறிவு என்ற படங்களில் நடித்து வரும் இவர், யூடியூபில் ஹிப்ஹாப் தமிழா என்ற பெயரில் சேனலை வைத்துள்ளார். இதனை 20 லட்சம் பேர் பின் தொடர்ந்து வரும் நிலையில், தனது பாடல்களை அந்த சேனலில் பதிவேற்றி வந்தார். இந்த நிலையில், ஹிப்ஹாப் தமிழா யூடியூப் சேனலை ஹேக் செய்த மர்மநபர்கள், அனைத்து வீடியோக்களையும் அழித்து அட்டூழியம் செய்துள்ளனர். இதனால் அதிர்ச்சி அடைந்துள்ள ஆதி தரப்பு, அழிக்கப்பட்ட வீடியோக்களை மீட்கும் முயற்சியில் இறங்கியுள்ளனர்.