தீவிரவாதத்துக்கு எதிரான போரில் இலங்கைக்கு இந்தியா உதவும் - அதிபர் மைத்திரிபால சிறிசேனவிடம் பிரதமர் மோடி உறுதி

இலங்கை சென்றுள்ள பிரதமர் மோடி அந்நாட்டின் அதிபர் மைத்திரிபால சிறிசேனவை சந்தித்து பேசினார். அப்போது இருநாட்டு வர்த்தகம் மற்றும் பாதுகாப்பு தொடர்பாக இருவரும் பேச்சுவார்த்தை நடத்தினர். அப்போது பிரதமர் மோடிக்கு வெள்ளை தேக்கால் ஆன புத்தர் சிலையை சிறிசேன பரிசாக வழங்கினார். அதை மகிழ்ச்சியுடன் பெற்றுக்கொண்ட மோடி, பின்னர் அவருக்காக ஏற்பாடு செய்யப்பட்ட சிறப்பு விருந்தில் பங்கேற்றார். இதையடுத்து சிறிசேன உடனான சந்திப்பு குறித்து டிவிட்டரில் கருத்து தெரிவித்த பிரதமர் மோடி, 10 நாட்களில் நண்பர் சிறிசேன உடனான இரண்டாவது சந்திப்பு இது என்றும் தீவிரவாதம் என்பது இருநாடுகளுக்குமே அச்சுறுத்தல் என்றும்  குறிப்பிட்டுள்ளார்.   இலங்கைக்கு இந்தியா தொடர்ந்து உறுதுணையாக இருக்கும் என உறுதி அளித்ததாக தெரிவித்துள்ளார். மேலும், தீவிரவாதத்தை வேரறுக்க இருநாடுகளும் இணைந்து பாடுபட வேண்டும் என்று பேசியதாக குறிப்பிட்டுள்ளார்.