மதுரை : சுங்கச்சாவடியில் தகராறில் ஈடுபட்ட 6 பேர் கும்பல் : துப்பாக்கியால் சுட்டு ஊழியர்களுக்கு அச்சுறுத்தல்

திருமங்கலத்தை அடுத்த கப்பலூர் சுங்கச் சாவடியில், காரில் வந்த 6 பேர் கும்பல், கட்டணம் தர மறுத்து ஊழியர்களிடம் கைகலப்பில் ஈடுபட்டுள்ளது. மேலும், மறைத்து வைத்திருந்த துப்பாக்கியை எடுத்து வானை நோக்கி 3 முறை சுட்டுள்ளது. இதனால் சுங்கசாவடி ஊழியர்கள் அச்சமடைந்தனர். பின்னர், காரில் தப்பி சென்ற அக்கும்பலில் இருந்து சசிகுமார் என்பவரை துப்பாக்கியுடன் போலீசார் மடக்கி பிடித்தனர். காரில் தப்பிய மற்ற 5 பேரையும் உசிலம்பட்டி அருகே போலீசார் மடக்கி பிடித்து கைது செய்தனர். அவர்களிடமிருந்து 3 துப்பாக்கிகள், 18 தோட்டாக்கள், 14 செல்போன்கள், 10 தங்க மோதிரம், 2 தங்க செயின், 34 ஆயிரத்து 500 ரூபாய் பணம் உள்ளிட்டவற்றை போலீசார் கைப்பற்றினர். கைதான 6 பேர் மீதும் பல்வேறு கொலை, கொள்ளை வழக்குகள் உள்ளது விசாரணையில் தெரிய வந்துள்ளது.  

அவர்களில், மதுரை மேலூரை சேர்ந்த வசூல்ராஜா மற்றும் சென்னை எண்ணூரை சேர்ந்த தனசேகரன் ஆகிய இருவர் மீது 30க்கும் மேற்பட்ட கொலை கொள்ளை வழக்குகள் உள்ளதாகவும், மற்ற 4 பேர் மீதும் பல வழக்குகள் உள்ளதாகவும்  மதுரை மாவட்ட காவல் கண்காணிப்பாளர் மணிவண்ணன் தெரிவித்தார். இது குறித்து, போலீசார் தீவிர விசாரணை நடத்தி வருகின்றனர். தமிழகத்தில் தீவிரவாதிகள் ஊடுருவி உள்ளதாக எச்சரிக்கப்பட்ட நிலையில் கைத்துப்பாக்கிகளுடன் இக்கும்பல் பிடிபட்டது அப்பகுதியில் பரபரப்பை ஏற்படுத்தியுள்ளது.