தமிழகத்தில் பல இடங்களில் பரவலாக மழை

நாமக்கல் மாவட்டம் திருச்செங்கோடு மற்றும் பள்ளிபாளையம் சுற்றுவட்டாரப் பகுதிகளில் இரவு இடியுடன் கூடிய கனமழை பெய்தது. சுமார் 2 மணி நேரத்திற்கும் மேலாக பெய்த கனமழையால் பகல் முழுவதும் வெப்பம் தாக்கிய நிலையில், இதமான குளிர் காற்று வீசியதால் பொதுமக்கள் மகிழ்ச்சி அடைந்தனர். இதனால் சாலையில் மழைநீர் பெருக்கெடுத்து ஓடியது. 

வேலூர் மாவட்டம் ஆம்பூர் சுற்றியுள்ள பகுதிகளில் சுமார் ஒரு மணி நேரம் சூறைக் காற்றுடன்  கனமழை பெய்தது .கைலாசகிரி  பகுதியில் சாலையோரம் இருந்த மரம் அங்குள்ள  பீடி தொழிலாளி முபாரக் அலி வீட்டின் மீது  சாய்ந்ததில் வீடு முற்றிலும் சேதமடைந்தது.இதில் அவரது மகளின் திருமணத்திற்காக வாங்கி வைத்திருந்த பீரோ, கட்டில் மற்றும் பித்தளை சாமான்கள் உள்ளிட்ட சுமார் ஒரு லட்சம் மதிப்பிலான பொருட்கள் சேதமடைந்தது. மேலும் வீட்டில் இருந்த 2 குழந்தைகள் உட்பட நான்கு பேர் சிறிய காயங்களுடன் உயிர் தப்பினர்.

ஈரோடு மற்றும் சுற்றுவட்டார பகுதிகளில் 2 மணி நேரத்திற்கு மேலாக பெய்த மழையால் சாலைகளில் தண்ணீர் பெருக்கெடுத்து ஓடியது. கருங்கல்பாளையம், மொடக்குறிச்சி, ஆனைக்கால் பாளையம், லக்காபுரம், உள்ளிட்ட பகுதிகளில் பலத்த மழை பெய்தது. இதேபோல்   மொடக்குறிச்சி, பவானி,  கவுந்தபாடி  உள்ளிட்ட பகுதிகளிலும்  இடி - மின்னலுடன் மழை கொட்டி தீர்த்தது.