நடிகர் சங்க தேர்தலை நிறுத்தி வைக்க உத்தரவு
நடிகர் சங்க தேர்தலை நிறுத்தி வைக்குமாறு சங்கங்களின் பதிவாளர் உத்தரவிட்டுள்ளார்.
தென்னிந்திய நடிகர் சங்க தேர்தல் வரும் 23ஆம் தேதி நடைபெறும் என்று அறிவிக்கப்பட்டது. இதையொட்டி நடிகர் விஷால் தலைமையிலான பாண்டவர் அணியினரும், இயக்குனர் பாக்யராஜ் தலைமையிலான சங்கரதாஸ் சுவாமி அணியினரும் தனித்தனியாக நாடக நடிகர்களை சந்தித்து தங்களுக்கு ஆதரவு திரட்டி வந்தனர்.
இந்நிலையில் நடிகர் சங்க தேர்தல் நடைபெறுவதாக இருந்த சென்னை ஜானகி -எம்.ஜி.ஆர் கல்லூரியில் அதே நாளில் எஸ்.வி. சேகரின் நாடகம் நடைபெறுவதாக போஸ்டர்கள் வெளியாகின. அந்த இடத்தை முன்பதிவு செய்ததற்கான ரசீதை எஸ் வி. சேகர் வெளியிட்டதால் திட்டமிட்டபடி அன்று நடிகர் சங்க தேர்தல் நடைபெறுமா? என்று கேள்வி எழுந்தது.
இந்நிலையில் நடிகர் சங்க தேர்தலுக்கு போலீசார் அளிக்க பாதுகாப்பு கோரி நடிகர் விஷால் தரப்பில் சென்னை உயர்நீதிமன்றத்தில் வழக்கு தொடரப்பட்டது. நடிகர் சங்க தேர்தலை நியாயமாக நடத்த உதவுமாறு கோரி விஷால் உள்ளிட்டோர் ஆளுனர் பன்வாரிலால் புரோகித்தை சென்னை ஆளுனர் மாளிகையில் நேரில் சந்தித்து மனு அளித்தனர்.
இதனிடையே, நடிகர் சங்க தேர்தலை நிறுத்தி வைக்குமாறு மாவட்ட சங்கங்களின் பதிவாளர் உத்தரவிட்டுள்ளார். நடிகர் சங்கத்தை சேர்ந்த பாரதி பிரியன் மற்றும் 61 உறுப்பினர்களின் புகார் மனுக்களை பெற்று விசாரணை நடத்தி இந்த உத்தரவு பிறப்பிக்கப்பட்டுள்ளதாக உத்தரவில் குறிப்பிடப்பட்டுள்ளது. நடிகர் சங்க நிர்வாகிகள் தேர்தலில் வாக்களிக்க தகுதி உள்ள உறுப்பினர்களின் பட்டியல் இறுதி செய்ய வேண்டி உள்ளதாகவும், இந்த சூழ்நிலையில் நடிகர் சங்க தேர்தலை நடத்துவது ஏற்புடையதாக இல்லை என்றும் அந்த உத்தரவில் தெரிவிக்கப்பட்டுள்ளது.
Next Story