எப்படி இருக்கிறது ராட்சசன் ?

நடிகர் விஷ்ணு விஷால் ,அமலாபால் ,ராதாரவி ,நிழல்கள் ரவி ,முனீஸ்காந்த், காளி வெங்கட் மற்றும் பலர் நடித்துள்ள இந்த படத்தை முண்டாசுப்பட்டி பட இயக்குனர் ராம்குமார் இயக்கியுள்ளார்.அருண் என்ற கதாப்பாத்திரத்தில் நடித்திருக்கும்" விஷ்ணு விஷால்" க்கு இயக்குநராகும் ஆசை. அதற்காக உலகம் முழுவதும் நடந்த சைக்கோ கிரைம் செய்திகளை சேகரித்து அதை மையமாக வைத்து ஒரு படத்தை இயக்குவதற்கு வாய்ப்பு தேடி அலைகிறார். வாய்ப்பு கிடைக்காததால் தனது மாமா உதவியுடனும் ஏற்கெனவே அவரது தந்தை போலீஸ் அதிகாரியாக இருந்து இறந்தவர் என்பதனாலும் காவல்துறையில் சப் இன்ஸ்பெக்டர் ஆகிறார்

தனது 15 வயது மகளை காணவில்லை என்று ஒருவர் ஹீரோ இருக்கும் காவல் நிலையத்தில் புகார் அளிக்கிறார். இரண்டு நாட்கள் கழித்து அந்த பெண்ணின் உடல் கொடூரமாக கொலை செய்யப்பட்டு கிடக்கிறது. இதைப் பார்த்து அதிர்ச்சி அடைந்த ஹீரோ தன் வீட்டிற்கு சென்று அவர் சேகரித்த க்ரைம் செய்திகளை புரட்டிப் பார்க்கிறார். போலீஸ் வேலைக்கு சேரும் முன்பு நடந்த  இளம்பெண் படுகொலையுடன் இந்த  கொலையும் ஒத்துப் போகிறது. ஒரு சைக்கோ கொலைகாரன் குறிப்பாக 15 வயது பள்ளி மாணவிகளை கடத்தி கொடூர கொலை செய்கிறான் என்பதை கண்டுபிடிக்கிறார் .

யார் இந்த சைக்கோ கொலைகாரன்?அவன் எதற்கு இத்தனை கொலைகள் செய்கிறான் ? அவனை எப்படி ஹீரோ பிடித்தார்? என்பதை நல்ல திரைக்கதை அமைத்து மிரட்டலான சைக்கோ த்ரில்லராக கொடுத்துள்ளார் இயக்குனர்.

முண்டாசுப்பட்டி படத்திற்கு பிறகு ராம் குமார் இயக்கும் இரண்டாவது படம் ராட்சசன். பொதுவாக சைக்கோ த்ரில்லர் படங்கள் இரண்டு மணி நேரத்திற்கு மேல் இருக்காது. ஆனால் இந்த படம் இரண்டரை மணி நேரம் ஓடினாலும் அடுத்து என்ன நடக்கும் என்று யூகிக்க முடியாத அளவிற்கு விறுவிறுப்பாக திரைக்கதை அமைத்து நம்மை பிரம்மிக்க வைத்துள்ளார் இயக்குனர்.

நடிகர் விஷ்ணு விஷால் நிஜத்தில் ஒரு போலீஸ் அதிகாரி எவ்வாறு சைக்கோ கொலைகளை கையாள்வாரோ அதேபோல் தனது எதார்த்த நடிப்பில் அசத்தியுள்ளார். இந்த படம் அவரின் 

திரைப்பயணத்தில் ஒரு மைல்கல். பள்ளிக்கூட டீச்சராக வரும் அமலாபால் இயல்பான நடிப்பை வெளிப்படுத்தியுள்ளார்.

முண்டாசுப்பட்டி படத்தில் நகைச்சுவை வேடத்தில் நடித்த முனீஸ்காந்த், காளி வெங்கட் இருவருக்கும் மனதில் நிற்கும்படி எமோஷனலான கதாபாத்திரம் கொடுக்கப்பட்டுள்ளது.ஜிப்ரானின் பின்னணி இசையில் உலகத்தரமான சைக்கோ திரில்லர் படத்தை எடுத்து அசத்தி உள்ளார் இயக்குனர் ராம் குமார்.