தென்காசியில் காசி விஸ்வநாதர் கோயில் பராமரிப்பு இன்றி இருப்பதாக, மத்தியப் பிரதேச மாநில முன்னாள் முதலமைச்சர் சிவராஜ் சிங் சவுகான் வேதனை தெரிவித்துள்ளார். தென்காசி வந்த அவர், காசி விஸ்வநாதர் கோயிலில் சாமி தரிசனம் செய்தார். தொடர்ந்து குற்றாலத்தில் உள்ள தனியார் விடுதியில் புதிய இளம் வாக்காளர்களுடன் சேர்ந்து கலந்துரையாடிய அவர், பின்னர் செய்தியாளர்களை சந்தித்தார். மக்களவைத் தேர்தலில் பாஜக கூட்டணி 400 இடங்களில் வெற்றி பெறும் என்ற சிவராஜ் சிங் சவுகான், தமிழகத்தில் 25 இடங்களில் பாஜக வெற்றி பெற வாய்ப்புகள் உள்ளதாக தெரிவித்தார். மேலும், காசி விஸ்வநாதர் சுவாமி கோயிலை பராமரிக்காமல் போட்டுள்ளதை கண்டு, தனக்கு மிகந்த மனவேதனை ஏற்பட்டதாகவும் கூறினார்.