திருச்சி மாவட்டம், தொட்டியம் காட்டுப்புத்தூர் அருகே சீலைப் பிள்ளையார்புத்தூரில் இரு சமுதாயத்தினரை அவதூறாக எழுதி துண்டு பிரசுரம் ஒட்டியதை கண்டித்து போராட்டம் நடைபெற்றதால், அப்பகுதியில் சட்டம் ஒழுங்கு பிரச்சனைகள் ஏற்படாமல் இருப்பதற்கு 50க்கும் மேற்பட்டபோலீசார் பாதுகாப்பு பணியில் ஈடுபட்டு வந்தனர்.

இதில் நேற்று இரவு பாதுகாப்பு பணியில் ஈடுபட்டிருந்த போலீசாரின் வாகனம் ஆற்றங் கரையிலிருந்து சீலைப்பிள்ளையார் புத்தூர் பேருந்து நிலையத்தின் அருகே சென்று கொண்டிருந்தபோது, எதிரே வந்த இருசக்கர வாகனத்தில் வந்த இருவர் மீது வேகமாக மோதியது. இதில் இருசக்கர வாகனம் போலீஸ் வாகனத்தின் அடியில் சிக்கிக் கொண்டது. இதனை பார்த்த அப்பகுதி பொதுமக்கள் போலீஸ் வாகனத்தை சாய்த்து அடியில் சிக்கிக் கொண்ட இருவரையும் மீட்டு சிகிச்சைக்காக கரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர். மருத்துவமனை செல்லும் வழியில் சுமார் 45 மதிக்கத்தக்க பெண் இறந்து போனார். உடன் வந்தவர் தனியார் மருத்துவமனையில் தீவிர சிகிச்சை பெற்று வருகிறார்.