கர்நாடகாவில் புதிய அரசு அமைந்ததையடுத்து, வருகிற 5ம் தேதியன்று பட்ஜெட் தாக்கல் செய்யப்பட உள்ளது. ஏற்கனவே, கடந்த ஆட்சியில் தாக்கல் செய்யப்பட்ட பட்ஜெட்டையை பின்பற்றுமாறு சித்தராமையா கூறியதை ஏற்காமல், பட்ஜெட் பணிகளில் முதலமைச்சர் குமாரசாமி ஈடுபட்டுள்ளார்.
இந்நிலையில், கர்நாடக கூட்டணி அரசு 5 ஆண்டுகள் நிலைப்பது கடினம் என்றும் நாடாளுமன்ற தேர்தலுக்கு பிறகு என்னவாகும் என பொறுத்திருந்துதான் பார்க்க வேண்டும் எனவும் சித்தராமையா பேசிய வீடியோ சமூக வலைதளங்களில் வேகமாக பரவி வருகிறது. நேற்று மேலும் 7 எம்.எல்.ஏ.க்கள் சித்தராமையாவை சந்தித்ததால் பெரும் சர்ச்சை ஏற்படுத்தி உள்ளது.
ஆனால், சித்தராமையாவின் இந்த வீடியோ குறித்து நீர்வளத் துறை அமைச்சரான காங்கிரசை சேர்ந்த டி கே சிவகுமார் கூறுகையில், கட்சி முடிவின்படி 5 ஆண்டுகள் அரசு நீடிக்கும் எனவும் தனிநபர் கருத்து எதுவும் கிடையாது எனவும் தெரிவித்தார். இதற்கிடையே, ஊடகங்கள் தான் இந்த விஷயத்தை பெரிதாக்குவதாக முதலமைச்சர் குமாரசாமி கூறியுள்ளார்.