இங்கிலாந்து ராணி எலிசபெத் காலமானதையடுத்து, பாரம்பரிய வழக்கப்படி எலிசபெத் குடும்பத்தின் மூத்த உறுப்பினரும், பட்டத்து இளவரசருமான 73 வயது சார்லஸ், இங்கிலாந்தின் அடுத்த மன்னராக பொறுப்பேற்கவுள்ளார். இந்நிலையில், நாட்டு மக்களுக்கு தொலைக்காட்சி வழியாக உரையாற்றினார். சுமார் 7 நிமிடங்கள் அவர் ஆற்றிய உரையில், கடந்த ஆண்டு மறைந்த தனது தந்தை பிலிப், தற்போது மறைந்த தாயார் எலிசபெத் ஆகியோரை நினைவு கூர்ந்தார். கடந்த 1947-ஆம் ஆண்டு, ராணி எலிசபெத் தனது 21-ஆவது பிறந்த நாளில், தனது வாழ்வை நாட்டு மக்களுக்கு சேவை செய்ய அர்ப்பணிப்பதாகக் கூறியதை தனது உரையில் குறிப்பிட்ட சார்லஸ், அதேபோன்று கடவுள் தனக்கு அளிக்கும் எஞ்சிய காலம் முழுவதும் நாட்டு மக்களுக்கு சேவையாற்ற இருப்பதாக உறுதியளித்தார்.