மொனாக்கோ நாட்டில் நடக்கும் சர்வதேச மாற்று எரிசக்தி படகு போட்டிக்கு கோவையைச் சேர்ந்த கல்லூரி மாணவர்கள் தொடர்ந்து 2வது முறையாக தகுதி பெற்றுள்ளனர்.வழக்கமான எரிசக்தியை பயன்படுத்தாமல் பேட்டரி , சோலார் போன்ற மாற்று சக்தி மூலம் இயங்கும் படகுகளை உருவாக்குவதை மொனாக்கோ அரசு ஊக்குவித்து, ஆண்டுதோறும் சர்வதேச ஆற்றல் படகு போட்டியை நடத்தி வருகிறது. இந்த ஆண்டு வருகிற ஜூலை மாதம் 3ம் தேதியிலிருந்து 8ம் தேதி வரை இந்த படகு போட்டி நடைபெறுகிறது. இந்நிலையில், இந்தப் படகுப் போட்டிக்கு கோவையைச் சேர்ந்த தனியார் பொறியியல் கல்லூரி மாணவர்கள் தகுதி பெற்றுள்ளனர். யாளி 2.0 எனும் பெயரில் 280கிலோ எடை கொண்ட படகை கரிம நார் மூலம் உருவாக்கியுள்ள இந்த மாணவர்கள், சோலார், பேட்டரி, ஹைட்ரஜன் பியூல் மூலம் இந்த படகும் இயங்கும் வகையில் வடிவமைத்து உள்ளனர்.