அமெரிக்க துணை அதிபர் வேட்பாளர்கள் கமலா ஹாரிஸ், மைக் பென்ஸ் நேருக்கு நேர் விவாதம்

அமெரிக்காவில் புதிய தலைமைக்கான நேரம் இது என்று பேசிய கமலா ஹாரிஸுக்கு, ஆட்சி மாற்றத்திற்கு இடமே இல்லை என மைக் பென்ஸ் பதிலடி கொடுத்தார். அமெரிக்க தேர்தல் நடைமுறைப்படி குடியரசு கட்சி மற்றும் ஜனநாயக கட்சி சார்பில் துணை அதிபர் வேட்பாளர்களாக போட்டியிடும் மைக் பெனஸ் மற்றும் கமலா ஹாரிஸ் இடையிலான நேரடி விவாத நிகழ்ச்சியில் அவர்கள் இவ்வாறு பேசினர்.

நேருக்குநேர் விவாதத்தில் பேசிய துணை அதிபர் வேட்பாளர்கள் இருவரும், கறுப்பினத்தைச் சேர்ந்த ஜார்ஜ் பிளாய்ட் மரணம் அநீதியானது என்றனர்.  தொடர்ந்து பேசிய கமலா ஹாரிஸ், இனவாதம் பற்றி பேச டிரம்ப் அரசு தயாராக இல்லை என விமர்சித்தார்.  அமெரிக்காவின் அடிப்படையில் இனவாதம் இருப்பதாக கருதுவது தவறு என்று பென்ஸ் பதிலளித்தார். 

டிரம்ப் அரசின் மீது மக்களுக்கு வெறுப்பு அதிகரித்துள்ளதால் ஜனநாயக கட்சிக்கு வெற்றி  வாய்ப்பு பிரகாசமாக இருப்பதாக கமலா ஹாரிஸ்  நம்பிக்கை தெரிவித்தார். 2016-ஐ போல் 2020ம் ஆண்டு தேர்தலிலும் டிரம்புக்கே மக்கள் வெற்றியை தருவார்கள் என பென்ஸ் கூறினார்.  இதனை மறுத்த கமலா ஹாரிஸ், அமெரிக்காவில் புதிய தலைமைக்கான நேரம் இது என்றார்.  ஆட்சி மாற்றம் என்ற பேச்சுக்கே இடமில்லை, மீண்டும் டிரம்ப் தான் அதிபர் என மைக் பென்ஸ் நம்பிக்கை தெரிவித்தார்.