சிஏஏ குறித்த ரஜினியின் கருத்துக்கு கண்டனம் : இஸ்லாமிய அமைப்பினர், எதிர்கட்சியினர் ஆர்ப்பாட்டம்

சென்னை ராயபுரம் பகுதியில் ஜமாத் கூட்டமைப்பினர் முற்றுகை போராட்டத்தில் ஈடுபட்டனர். இதில் ஆயிரக்கணக்கானோர் கலந்து கொண்டனர். அமைச்சர் ஜெயக்குமார் அலுவலகத்தை முற்றுகையிட முயன்ற அவர்கள், குடியுரிமை திருத்த சட்டத்தை தமிழகத்தில் அமல்படுத்த கூடாது என்று வலியுறுத்தினர். இது தொடர்பாக சட்டப்பேரவையில் தீர்மானம் நிறைவேற்ற வேண்டும் என்று கோரி அவர்கள் முழக்கங்கள் எழுப்பினர். பேரணியாக சென்றவர்களை போலீசார் தடுத்து நிறுத்தினர். இதனால் அப்பகுதியில் போக்குவரத்து பாதிப்பு ஏற்பட்டது. 

சென்னையை அடுத்த தாம்பரம் மண்டல பாஸ்போர்ட் அலுவலகத்தை, அனைத்து முஸ்லிம் ஜமாத் சார்பில் குடியுரிமை திருத்த சட்டத்திற்கு எதிர்ப்பு தெரிவித்து முற்றுகையிடும் ஆர்ப்பாட்டம் நடத்தப்பட்டது. பாஸ்போர்ட் அலுவலகம் நோக்கி வந்த அவர்களை தாம்பரம் நகராட்சி அலுவலகம் வரை மட்டுமே போலீசார் அனுமதித்தனர். இதையடுத்து, நகராட்சி அலுவலகம் அருகே ஆர்ப்பாட்டம் நடைபெற்றது. இதில் விடுதலை சிறுத்தைகள், மதிமுக உள்ளிட்ட கட்சியினர், இஸ்லாமியர்கள் ஆயிரத்திற்கும் மேற்பட்டோர் கலந்து கொண்டு குடியுரிமை திருத்த சட்டத்தை வாபஸ் பெற வலியுறுத்தி கோஷமிட்டனர்.