ஊரக உள்ளாட்சி தேர்தல் - இறுதி வேட்பாளர் பட்டியல் வெளியீடு

இது தொடர்பாக மாநிலம் தேர்தல் ஆணையம் வெளியிட்டுள்ள அறிக்கையின் படி, 27 மாவட்டங்களில் உள்ள 91 ஆயிரத்து 975 பதவியிடங்களுக்கு, 3 லட்சத்து 2 ஆயிரத்து 994 வேட்பு மனுக்கள் பெறப்பட்டு பரிசீலனை செய்யப்பட்டுள்ளது.

ஊரக உள்ளாட்சி தேர்தலில் 18 ஆயிரத்து 570 பதவிடங்களுக்கு வேட்பாளர்கள் போட்டியின்றி தேர்ந்தெடுக்கப்பட்டதாகவும்,  2 லட்சத்து 31 ஆயிரத்து 890 வேட்பாளர்கள் இறுதிப்போட்டியில் தேர்தல் களத்தில் உள்ளதாகவும் தேர்தல் ஆணையம் கூறியுள்ளது.

76 ஆயிரத்து 746 கிராம ஊராட்சி வார்டு உறுப்பினர்களுக்கான தேர்தலில், 18 ஆயிரத்து 137 பேர் போட்டியின்றி தேர்ந்தெடுக்கப்பட்டுள்ளனர். 

9 ஆயிரத்து 624 கிராம ஊராட்சி மன்ற தலைவர்கள் பதவியிடங்களுக்கான தேர்தலில்,  410  வேட்பாளர்கள் போட்டியின்றி தேர்வு செய்யப்பட்டுள்ள நிலையில்,35 ஆயிரத்து 611 பேர் களத்தில் உள்ளனர்.

5 ஆயிரத்து 90 ஊராட்சி ஒன்றிய வார்டு உறுப்பினர்கள் பதவியிடங்களுக்கான தேர்தலில் 23 பேர் போட்டியின்றி தேர்வு செய்யப்பட்டனர். 

மீதமுள்ள 5 ஆயிரத்து 67 பதவியிடங்களுக்கு 22 ஆயிரத்து 776 வேட்பாளர்கள் போட்டியிடுகின்றனர்.

அதேபோல், 515 மாவட்ட ஊராட்சி வார்டு உறுப்பினர்கள் பதவியிடங்களுக்கு 2 ஆயிரத்து 605 வேட்பாளர்கள் போட்டியிடுவதாகவும், மாநில  தேர்தல் ஆணையம் வெளியிட்டுள்ள அறிக்கையில் கூறப்பட்டுள்ளது.