தமிழகத்தில் 2 ஆண்டுகளில் 429 காவலர்கள் மீது தாக்குதல் - அதிர்ச்சி தகவல்

காவல்துறையில் பணியாற்றும் காவலர்கள் மீது கடந்த சில மாதங்களாக நடத்தப்படும் தாக்குதல்கள் அதிகரித்த வண்ணம் உள்ளன. ஆனால் கடந்த 2015 மற்றும் 2016 ஆம் ஆண்டுகளில் சுமார் 429 காவலர்கள் மீது தாக்குதல் நடத்தப்பட்டதாக மாநில குற்ற ஆவண காப்பகத்தின் பதிவு தெரிவிக்கிறது. தீவிரவாதிகளால் தாக்கப்பட்டவர்கள், கலவரத்தில் தாக்கப்பட்டவர்கள், குற்றவாளிகளால் தாக்கப்பட்டவர்கள் மற்றும் விபத்தில் மரணமடையும் காவலர்கள் என எட்டு பிரிவுகளாக அதில் பிரிக்கப்பட்டிருக்கிறது. அதில் 2015ஆம் ஆண்டு கலவரங்கள் மற்றும் கூட்டங்கள் கூடிய பகுதியில் பணியாற்றிய 54 காவலர்கள் மீது தாக்குதல் நடத்தப்பட்டதில் அவர்கள் படுகாயமடைந்தனர். அதே ஆண்டு காவலர்கள் மீது குற்றவாளிகள் நடத்திய தாக்குதலில் ஒரு ஆய்வாளர், 5 காவல் உதவி ஆய்வாளர்கள் உட்பட 34 பேர் காயமடைந்தனர். இதேபோல் 2016 ஆம் ஆண்டு கலவரம் மற்றும் பெரும் கூட்டங்களில் பாதுகாப்பு பணியில் ஈடுபட்டிருந்த காவலர்கள் மீது நடத்தப்பட்ட தாக்குதலில் 6 பேர் காயமடைந்தனர்.