சர்வதேச கிரிக்கெட்டில் இருந்து தோனி ஓய்வு பெறுகிறாரா?

சமீபகாலமாக தோனியின் ஆட்டம் மீது பல்வேறு விமர்சனங்கள் எழுந்து வருகின்றன. எப்போதும் அதிரடி ஆட்டத்தை வெளிப்படுத்தி எதிரணியை ஆட்டம்காண வைப்பவர் தோனி... ஆனால், தற்போது நடைபெற்றுவரும் இங்கிலாந்து தொடரில் அவரது ஆட்டம் மிகவும் விமர்சனத்திற்கு உள்ளாகியுள்ளது.  அடுத்த உலக கோப்பை தொடரும் இங்கிலாந்தில் தான் என்பதால், தோனிக்கு நெருக்கடி அதிகரித்துள்ளது. டெஸ்ட் போட்டிகளில் இருந்து ஓய்வை அறிவிப்பதற்கு முன்பாக நடுவரிடம் இருந்து பந்தை பெற்று சென்றார் தோனி, அடுத்த நாள் தோனி ஓய்வை அறிவித்தது ரசிகர்களை சோகத்தில் ஆழ்த்தியது. இந்நிலையில், நேற்றைய ஆட்டத்தில், தோனி நடுவரிடம் இருந்து பந்தை பெற்று சென்றுள்ளார். இதனால், அவர் எப்போது வேண்டுமானாலும் ஓய்வை அறிவிப்பார் என்ற தகவல் பரவ, அவரது ரசிகர்கள் அதிர்ச்சியில் உள்ளனர்.