மத்திய அரசுக்கு எதிராக நம்பிக்கை இல்லா தீர்மானம் - நாடாளுமன்ற மக்களவையில் இன்று விவாதம்

மத்திய அரசுக்கு எதிரான நம்பிக்கை இல்லா தீர்மானம் மீது மக்களவையில் இன்று விவாதம் நடைபெறுகிறது. மத்தியில் ஆளும் பிரதமர் மோடி தலைமையிலான பா.ஜ.க. அரசுக்கு எதிராக தெலுங்கு தேசம் உள்ளிட்ட எதிர்க்கட்சிகள் சார்பாக நம்பிக்கை இல்லா தீர்மானம் கொண்டு வரப்பட்டுள்ளது. நாடாளுமன்ற மழைக்கால கூட்டத்தொடர் தொடங்கிய முதல் நாளிலேயே கொண்டு வரப்பட்ட இந்த தீர்மானத்தை சபாநாயகர் சுமித்ரா மகாஜன் விவாதத்துக்கு எடுத்துக் கொள்வதாக அறிவித்தார். அதன்படி, நம்பிக்கையில்லா தீர்மானம் மீது மக்களவையில் இன்று விவாதம் நடைபெறுகிறது. விவாதத்துக்கு பிறகு, தீர்மானத்தின் மீது வாக்கெடுப்பு நடைபெறும் என எதிர்பார்க்கப்படுகிறது.

இந்நிலையில்,  மக்களவையில் விவாதத்தில் பங்கேற்று பேசுவதற்கு கட்சிகள் வாரியாக நேரம் ஒதுக்கீடு செய்யப்பட்டுள்ளது. ஆளும் கட்சியான பா.ஜ.க.வுக்கு 3 மணி  33 நிமிடங்களும், காங்கிரஸ் கட்சிக்கு 38 நிமிடங்களும் ஒதுக்கப்பட்டு உள்ளது. மூன்றாவது பெரிய கட்சியான அ.தி.மு.க.வுக்கு 29 நிமிடங்களும், திரிணாமுல் காங்கிரசுக்கு 27 நிமிடங்களும், பிஜூ ஜனதா தளத்துக்கு 15 நிமிடங்களும், சிவசேனாவுக்கு 14 நிமிடங்களும் நேரம் ஒதுக்கப்பட்டுள்ளது. இதேபோல தெலுங்கு தேசம் கட்சிக்கு 13 நிமிடங்களும், தெலங்கானா ராஷ்டிரிய சமீதி கட்சிக்கு 9 நிமிடங்களும் ஒதுக்கப்பட்டுள்ளது. மார்க்சிஸ்ட் கம்யூனிஸ்ட்டுக்கு 7 நிமிடங்கள், சமாஜ்வாதி மற்றும் தேசியவாத காங்கிரஸ் கட்சிகளுக்கு தலா 6 நிமிடங்கள்,  லோக் ஜன் சக்தி கட்சிக்கு 5 நிமிடங்கள். என மொத்தம் 6 மணி 35 நிமிடங்கள் வரை தீர்மானம் மீது விவாதம் நடத்த நேரம் ஒதுக்கப்பட்டுள்ளது. 

மக்களவையில் தொடர்ந்து பேசிய ராகுல் காந்தி, பாஜகவினர் உள்ளத்திற்குள் தம் மீது வெறுப்பை சுமந்திருப்பதாக குற்றஞ்சாட்டினார். பின்னர், தாம் எப்போது பாஜகவினர் மீது உள்ளத்தில் அன்பை சுமப்பதாகவும் கூறி, பிரதமர் மோடியை கட்டித் தழுவினார். அப்போது இருவரும் பரஸ்பரம் கைகுலுக்கி கொண்டனர்.