சுனாமி போல் தாக்கும் வெள்ளம்.. அடித்து செல்லப்பட்ட கார்கள், மக்கள் - கொத்து கொத்தாக சடலங்கள்

ஹிமாச்சலப்பிரதேச மாநிலத்தில் கனமழை பெய்து வருகிறது. இதன் காரணமாக பல இடங்களில் வெள்ளம் கரைபுரண்டோடுகிறது. நீர்நிலைகளில் வெள்ளப்பெருக்கு ஏற்பட்டுள்ளது. சிம்லா மாவட்டத்தில் உள்ள கோட்கர் பகுதியில் மழை காரணமாக நிலச்சரிவு ஏற்பட்டு வீடு இடிந்து விழுந்தது. இதில் ஒரே குடும்பத்தைச் சேர்ந்த 3 பேர் உயிரிழந்தனர். நிலச்சரிவில் குலு நகருக்கு அருகே ஒரு தற்காலிக வீடு சேதமடைந்து பெண் ஒருவர் உயிரிழந்தார். சம்பாவின் கட்டியான் தெஹ்சில் பகுதியில் ஏற்பட்ட நிலச்சரிவில் ஒருவர் உயிருடன் புதைந்து உயிரிழந்தார். கடந்த 36 மணி நேரத்தில் 13 நிலச்சரிவுகளும், 9 திடீர் வெள்ளமும் பதிவாகியுள்ளதாக, மாநில அவசரகால செயல்பாட்டு மையம் தெரிவித்துள்ளது. 3 தேசிய நெடுஞ்சாலைகள் உட்பட மொத்தம் 736 சாலைகள் போக்குவரத்துக்காக தடை செய்யப்பட்டுள்ளது. கடந்த 24 மணி நேரத்தில் பெய்த கனமழையால் ஆயிரத்து 743 டிரான்ஸ்பார்மர்கள் பாதிக்கப்பட்டுள்ளதுடன், 138 குடிநீர் திட்டங்கள் சேதமடைந்துள்ளன. பள்ளி, கல்லூரிகளுக்கு மேலும் 2 நாட்களுக்கு விடுமுறை அளிக்கப்பட்டுள்ளதாக, மாநில கல்வி அமைச்சகம் தெரிவித்துள்ளது.