"இதான் கூட்டணி தர்மமா?" - சிபிஎம் தலைவரை சரமாரியாக விமர்சித்த முரசொலி

தொழிலாளர் திருத்த சட்டத்தை முதலமைச்சர் மு.க.ஸ்டாலின், 2 நாட்களில் திரும்பப் பெற்றுவிட்ட நிலையில், சி.பி.எம். மூத்த தலைவர்களில் ஒருவரான டி.கே.ரங்கராஜனின் பேச்சுக்கு, முரசொலி நாளிதழ் கண்டனம் தெரிவித்துள்ளது. தமிழகத்தை திமுக அரசு ஆட்சி செய்கிறதா? - அல்லது அதிகாரிகளும் முதலாளிகளும் சேர்ந்து ஆட்சி செய்கிறார்களா? என டி.கே.ரங்கராஜன் கூறியிருப்பதை சுட்டிக்காட்டியுள்ளது.

திமுக அரசை அதிகாரிகள் தவறாக வழி நடத்துகிறார்கள் என்ற தவறான தகவலை டி.கே ரங்கராஜனுக்கு சொன்னது யார் ? - எதை வைத்து அவர் சொல்கிறார்? - கூட்டணியில் இருந்து கொண்டு பொதுவெளியில் கூக்குரலிடுவது தான் கூட்டணி தர்மமா? என்றும் அடுக்கடுக்கான கேள்விகளை எழுப்பியுள்ளது. திமுக அரசு தொடர்ந்து இருக்க வேண்டுமானால் என்று சொல்லும் தகுதியோ, யோக்கியதையோ டி.கே.ரங்கராஜன் போன்றோருக்கு இல்லை என்றும் முரசொலி நாளிதழ் தெரிவித்துள்ளது.