சிதம்பரத்தில் தவெக வேட்பாளர் மனு தள்ளுபடி சிதம்பரம் சட்டமன்றத் தொகுதியில் தமிழக வெற்றிக் கழகத்தின் சார்பில் அறிவிக்கப்பட்ட டாக்டர் பாரியின் வேட்புமனு தள்ளுபடி செய்யப்பட்டுள்ளது. வேட்புமனு பரிசீலனையின் போது, டாக்டர் பாரி தனது விண்ணப்பத்தைச் சரியாகப் பூர்த்தி செய்யவில்லை எனக் கூறி தேர்தல் நடத்தும் அலுவலர் கிஷன்குமார் மனுவை நிராகரித்தார். இருப்பினும், மாற்று வேட்பாளராக மனுத்தாக்கல் செய்திருந்த பாரியின் தந்தையான நெடுஞ்செழியனின் மனு ஏற்றுக்கொள்ளப்பட்டது. இதையடுத்துச் செய்தியாளர்களிடம் பேசிய நெடுஞ்செழியன், இது தனது மகனின் வெற்றியைத் தடுக்கச் செய்யப்பட்ட சதி என்றும், தற்போது தான் வேட்பாளராகக் களம் இறங்க வேண்டிய கட்டாயம் ஏற்பட்டுள்ளதாகவும் தெரிவித்தார். தற்காலிகமாகத் தடையை ஏற்படுத்தினாலும், விஜய்யின் வெற்றியை யாராலும் தடுக்க முடியாது என பாரி தெரிவித்தார்.