ஈரானில் இருந்து அணு ஆயுதங்களை வெளியேற்றுங்கள் என்று, ஜி7 நாடுகளின் தலைவர்களுக்கு இஸ்ரேல் அதிபர் ஐசக் ஹெர்சாக் வலியுறுத்தி உள்ளார். ஈரானில் உள்ள அணுசக்தி நிலையங்கள், ராணுவத் தளபதிகள், அணு விஞ்ஞானிகளை குறிவைத்து இஸ்ரேல் கடந்த வெள்ளிக்கிழமை முதல் தாக்குதல் நடத்தி வருகிறது. இந்த தாக்குதலில், தங்கள் ராணுவத்தை வழிநடத்திய மூத்த தளபதிகள் 8 பேர் உயிரிழந்ததாக ஈரான் தெரிவித்துள்ளது. மேலும், இதற்குப் பதிலடி கொடுக்கும் விதமாக, ஈரானும் ஏவுகணை தாக்குதல் நடத்தி வருவதாக கூறி, வீடியோ காட்சிகளை இஸ்ரேல் வெளியிட்டுள்ளது. இந்நிலையில், ஈரான் தாக்குதலில் சேதமடைந்த பகுதிகளை பார்வையிட்ட இஸ்ரேல் அதிபர், ஈரானில் இருந்து அணு ஆயுதங்களை வெளியேற்ற வேண்டும் என்று கனடாவில் நடைபெறும் ஜி7 மாநாட்டிற்கு வருகை தந்துள்ள தலைவர்களுக்கு கோரிக்கை விடுத்துள்ளார்.