வேலூர் மாவட்டம் காட்பாடி அடுத்த வி.டி.கே நகரில் உள்ள அம்மன் கோவிலில் கடந்த 15ஆம் தேதி, 108 கிலோ எடையுடன் கூடிய 3 அடி உயரம் கொண்ட ஐம்பொன் சிலை கொள்ளை போனது. இந்த சம்பவம் தொடர்பாக குற்றவாளிகளை போலீசார் தேடி வந்த நிலையில், வி.டி.கே நகரில் தண்டவாளத்தின் அருகே சாமி சிலை கிடப்பதாக போலீசாருக்கு தகவல் கிடைத்தது. இதையடுத்து அங்கு சென்று பார்த்தபோது அங்கு இருப்பது கொள்ளை போன ஐம்பொன் சிலைகள் என தெரியவந்தது. இதையடுத்து அவற்றை மீட்ட போலீசார், சம்பவம் தொடர்பாக நான்கு பேரை பிடித்து விசாரணை நடத்தி வருகின்றனர். உள்ளூர் மக்களுக்கு இடையே இருந்த பிரச்சினை காரணமாகவே சிலை திருடப்பட்டது என போலீசாரின் முதற்கட்ட விசாரணையில் தெரியவந்துள்ளது.