கடந்த 2 நாட்களாக நடத்தப்பட்ட இந்த விழாவில் 120 கலைகள் மேடையில் நிகழ்த்தப்பட்டது. சுமார் ஆயிரத்துக்கும் மேற்பட்ட கலைஞர்கள் கலந்து கொண்டு தங்கள் திறமைகளை வெளிப்படுத்தினர்... தொடர்ந்து ஆறு ஆண்டுகளாக இந்த நிகழ்ச்சி நடத்தப்படுவதாகவும், அழிந்து வரும் கலைகளை மீட்டெடுக்கும் ஒரு முயற்சி இது என்கிறார் கல்லூரியின் பேராசிரியர் லெனின். இந்த நிகழ்ச்சியானது சாதனை புத்தகத்தில் இடம்பெற்றுள்ள நிலையில், கிராமிய கலைகளை மீட்டெடுப்பதன் அவசியம் குறித்தும் இங்கே முன்வைக்கப்படுகிறது. 2 நாட்களாக நடந்த இந்த விழாவிற்கு படையெடுத்து வந்து அதை சாத்தியமாக்கிய இளைஞர் கூட்டமே அதற்கு சாட்சியாகவும் இருக்கிறது.

அதேநேரம் கலைஞர்களுக்கு வழங்கப்படும் உதவித் தொகை குறைவாகவே உள்ளதாகவும் குற்றச்சாட்டு முன்வைக்கப்படுகிறது. கிராமிய கலைகள் ஒரு பக்கம் அழிந்து வரும் நிலையில் அதை கற்க வருவோரும் இதனால் தயக்கம் காட்டுவதாகவும் கூறுகிறார் மூத்த கிராமிய கலைஞர் ராமகிருஷ்ணன். பெயர் கேள்விப்படாத கலைகளின் பின்னே ஆயிரம் ஆயிரம் அற்புதங்கள் ஒளிந்திருக்கும். இதிகாசங்களையும், புராணங்களையும் எளிமையாக புரிய வைக்கும் இந்த கலைகள் அடுத்த தலைமுறைக்கு கொண்டு சேர்க்கப்பட வேண்டியது இங்கே அவசியமானது... இதுபோன்ற விழாக்களை முன்னெடுத்து செல்வோரை ஊக்குவிக்க வேண்டியதும் நம் கடமையும் கூட...