மறைந்த முன்னாள் முதலமைச்சர் கருணாநிதியின் 96ஆவது பிறந்தநாள் இன்று. கருணாநிதி பிறந்த நாளில் மகிழ்ச்சி ஒருபுறம் என்றாலும், அவர் இல்லாதது ஏக்கத்தை தருவதாகவும், கண்ணீரைத் துடைத்து கடமை ஆற்றுவோம் என்றும், திமுக எம்.பி. திருச்சி சிவா தெரிவித்துள்ளார்.

"கருணாநிதி இல்லாத பிறந்த நாள் உருக வைக்கிறது" - கவிஞர் வைரமுத்து

தனக்கு நண்பராய், ஆசிரியராய், ஆசானாய் இருந்த கருணாநிதி இல்லாத பிறந்த நாள் உருக வைப்பதாகவும், அவரோடு அளவளாவிய நாட்கள் கனவாகிப் போனதாகவும், கவிஞர் வைரமுத்து தெரிவித்தார்.

"கருணாநிதி இல்லாத பிறந்த நாளை மனவேதனையுடன் பார்க்கிறேன்" - ஆற்காடு வீராசாமி, திமுக

மறைந்த முன்னாள் முதலமைச்சர் கருணாநிதியின் 96ஆவது பிறந்தநாள் இன்று. கருணாநிதி இல்லாத பிறந்தநாளை மனவேதனையுடன் பார்ப்பதாகவும், தன்னை தம்பி என்று அவர் அழைத்த நாட்களை எல்லாம் நினைவு கூர்வதாகவும், அவருடன் அதிக நெருக்கம் காட்டியவர்களில் முக்கியமானவரான ஆற்காடு வீராசாமி தெரிவித்தார்.

கருணாநிதியுடன் உதவியாளராக பயணித்த நாட்கள் எல்லாம் மறக்க முடியாதவை - சண்முகநாதன்

கருணாநிதியுடன் உதவியாளராக பயணித்த நாட்கள் எல்லாம் மறக்க முடியாதவை என, அவரது உதவியாளர் சண்முகநாதன் தெரிவித்தார்.

"திமுக எனது தாய் வீடு" - குஷ்பு

அரசியலில் கருணாநிதி போன்ற தலைவரைப் பார்க்க முடியாது என்றும், தமிழகம் இருக்கும் வரை கருணாநிதி நிச்சயம் இருப்பார் என்றும் காங்கிரஸ் செய்தித் தொடர்பாளர் குஷ்பு தெரிவித்தார்.

"கருணாநிதி என்பது நீண்ட நெடிய திராவிட தத்துவம்" - கி.வீரமணி

கருணாநிதி என்பது நீண்ட நெடிய திராவிட தத்துவம் என்றும், லட்சிய பயணத்தின் தொடர்ச்சி என்றும், திராவிடர் கழகத் தலைவர் கி.வீரமணி தெரிவித்தார்.