செங்கல்பட்டு மாவட்டம் மதுராந்தகம் தாலுகா அரசு மருத்துவமனையில் மருத்துவ அலுவலராக பணிபுரிந்த மருத்துவர் சுகுமாரன் கொரோனா தொற்றால் பாதிக்கப்பட்டார். மேல்மருவத்தூரில் உள்ள ஒரு தனியார் மருத்துவமனையில் அனுமதிக்கப்பட்ட அவர், மேல்சிகிச்சைக்காக சென்னை ராஜீவ்காந்தி அரசு மருத்துவமனையில் கடந்த 30ந்தேதி அனுமதிக்கப்பட்டார். இந்நிலையில் சிகிச்சை பலனின்றி அவர் நேற்று உயிரிழந்தார். மேலும், சென்னையில் மாநகர காவல் துறையை சேர்ந்த 2 பேர், அரசு ராஜீவ்காந்தி மருத்துவமனையில் பணியாற்றிய 2 செவிலியர்கள், அரசு மற்றும் தனியார் மருத்துவமனையில் பணியாற்றிய மருத்துவர்கள் உட்பட 20 க்கும் மேற்பட்ட கொரனோ தடுப்பு முன் களப்பணியாளர்கள் சிகிச்சை பலனின்றி உயிரிழந்துள்ளனர் என்பது குறிப்பிடத்தக்கது.