ராஜ்கோட்டில் நடந்து வரும் இந்தியா- இங்கிலாந்து இடையிலான 3-வது டெஸ்ட்போட்டியின் இரண்டாவது நாளில், ஜாக் கிரவ்லி(Zak Crawley) விக்கெட்டை வீழ்த்தியதன் மூலம் டெஸ்ட் கிரிக்கெட் அரங்கில் 500 விக்கெட்டுகளை கைப்பற்றிய 9-வது வீரர் என்ற சாதனையை அஸ்வின் படைத்தார். 3-வது நாள் ஆட்டம் இன்று நடைபெற்று வரும் நிலையில், அஸ்வின் போட்டியின் பாதியிலேயே திடீரென விலகி உள்ளார். இதுகுறித்து, தங்களுடைய அதிகாரப்பூர்வ எக்ஸ் தளத்தில் வெளியிட்டிருக்கும் பிசிசிஐ, "குடும்ப அவசர மருத்துவ சிகிச்சை காரணமாக எஞ்சிய போட்டியிலிருந்து ரவிச்சந்திரன் அஸ்வின் விலகியுள்ளார். இந்த சவாலான நேரத்தில், இந்திய கிரிக்கெட் கட்டுப்பாட்டு வாரியமும், இந்திய அணியும் அஸ்வினுக்கு முழு ஆதரவு அளிக்கிறோம்" என்று தெரிவித்துள்ளது.