தமிழக வீராங்கனை இந்துமதிக்கு சிறந்த கால்பந்து வீராங்கனை விருது வழங்கப்பட்டுள்ளது. அகில இந்திய கால்பந்து சம்மேளனத்தின் சார்பில் விருது வழங்கும் விழா டெல்லியில் நடைபெற்றது. இதில், 2023-24-ம் ஆண்டுக்கான இந்தியாவின் சிறந்த கால்பந்து வீராங்கனைக்கான விருதை இந்துமதி கதிரேசன் பெற்றுள்ளார். இந்திய பெண்களுக்கான கால்பந்து லீக் போட்டியில் ஒடிசா எப்.சி. வெற்றி பெற்றதில் முக்கிய பங்காற்றிய இந்துமதி, 5 கோல்கள் அடித்தார். கடலூரைச் சேர்ந்த இவர், சென்னையில் காவல்துறையில் பணியாற்றி வருகிறார். தமிழ்நாட்டை சேர்ந்த வீராங்கனை ஒருவர் இந்த விருதை பெறுவது இதுவே முதல் முறை என்பது குறிப்பிடத்தக்கது.