ஆசிய சாம்பியன்ஸ் டிராபி ஹாக்கி தொடரில் பங்கேற்றுள்ள 6 அணிகளின் கேப்டன்களுடன் விளையாட்டு மேம்பாட்டுத்துறை அமைச்சர் உதயநிதி ஸ்டாலின் கலந்துரையாடினார்.
தமிழ்ப் பாரம்பரிய உடையான வேட்டி, சட்டை அணிந்து இந்தியா, பாகிஸ்தான், மலேசியா உள்ளிட்ட 6 அணிகளின் கேப்டன்களும் கலந்துரையாடலில் பங்கேற்றனர். அப்போது, கேப்டன்களுக்கு நினைவுப் பரிசு வழங்கி அமைச்சர் உதயநிதி ஸ்டாலின் வாழ்த்து தெரிவித்தார். இது தொடர்பாக டுவிட்டரில் பதிவிட்டுள்ள உதயநிதி ஸ்டாலின், ஆசியக் கோப்பை ஹாக்கிப் போட்டிக்கான ஏற்பாடு, தமிழ்நாட்டின் உணவு - கலாசாரம் - விருந்தோம்பல் உள்ளிட்டவை குறித்து ஒவ்வொரு அணியின் கேப்டனும் மகிழ்ச்சியை வெளிப்படுத்தியதாகக் குறிப்பிட்டுள்ளார். முன்னதாக உதயநிதி ஸ்டாலினும் கேப்டன்களும் வேட்டி, சட்டை அணிந்து கோப்பையுடன் குழுப்புகைப்படம் எடுத்துக் கொண்டனர்.