ஆந்திர மாநிலம் விஜயவாடாவில் கிருஷ்ணா நதிக்கரையில், இந்திரகீலாத்ரி குன்றின் மீது கம்பீரமாக வீற்றிருக்கும் ஸ்ரீ கனகதுர்க்கை அம்மன் கோவில், தென்னிந்தியாவின் மிக முக்கியமான ஆன்மிகத் தலங்களில் ஒன்றாகத் திகழ்கிறது.

மனிதர்களால் செதுக்கப்படாத சுயம்பு மூர்த்தியாக அருள்பாலிக்கும் இக்கோயிலில் உள்ள அம்மன், மகிஷாசுரனை வதம் செய்த மகிழ்ச்சியில் தேவர்கள் தங்க மழை பொழியச் செய்ததால் 'கனக துர்க்கை' என்று அழைக்கப்படுகிறார்.

இந்தியாவின் முக்கியமான 18 மகா சக்தி பீடங்களில் ஒன்றாகப் போற்றப்படும் இக்கோவிலில், சக்தியின் முதன்மையை உணர்த்தும் வகையில் மல்லேஸ்வர சுவாமிக்கு வலது புறத்தில் அன்னை வீற்றிருப்பது மிகவும் அரிய சிறப்பம்சமாகும்.

தல வரலாற்றின்படி, அன்னை தனது மூக்குத்தியைக் கிருஷ்ணா நதியிடம் தற்காலிகமாகக் கடன் வாங்கியதாகவும், அதைத் திரும்பத் தராததால் நதி எப்போதும் மலையைத் தொட்டுச் செல்ல முயல்வதாகவும் ஐதீகம் இருப்பதால், எந்தவொரு அபிஷேகத்தின் போதும் அம்மனின் மூக்குத்தி கழற்றப்படுவதே இல்லை எனக் கூறப்படுகிறது.

மேலும், சபரிமலை ஐயப்பன் கோவிலைப் போலவே, இங்கும் பக்தர்கள் 'துர்கா மாலை' அணிந்து, கடுமையான விரதமிருந்து மலை ஏறி வந்து தங்களது தீட்சையைப் பூர்த்தி செய்யும் வழக்கம் உள்ளது.

ஒவ்வொரு ஆண்டும் 10 நாட்கள் இங்கு நடைபெறும் நவராத்திரி திருவிழாக்கள் உலகப் புகழ்பெற்றவை...

இந்த நாட்களில் ஒவ்வொரு நாளும் ஸ்ரீ பாலா திரிபுர சுந்தரி, ஸ்ரீ மகாலட்சுமி, ஸ்ரீ சரஸ்வதி உள்ளிட்ட பல்வேறு திருக்கோலங்களில் அன்னை அலங்கரிக்கப்பட்டு லட்சக்கணக்கான பக்தர்கள் மத்தியில் காட்சியளிப்பார்.

அன்னையை மனமுருகி வழிபட்டால் துன்பங்கள் நீங்கி, மனதில் அமைதியும், வாழ்வில் நம்பிக்கையும் கிடைக்கும் என்பது பக்தர்களின் ஆழமான நம்பிக்கை.