கர்நாடக மாநிலத்திற்கு தனி அந்தஸ்து பொருந்திய கொடியை கொண்டு வர கடந்த சித்தராமய்யா தலைமையிலான காங்கிரஸ் ஆட்சி முன்மொழிந்து இருந்தது. இந்நிலையில், இந்த விவகாரம் தொடர்பாக கருத்து தெரிவித்த பாஜக அமைச்சர் சி.டி. ரவி, மாநிலத்திற்கு தனி கொடி பயன்படுத்துவது இந்திய அரசியலமைப்புச் சட்டத்திற்கு எதிரானது என தெரிவித்திருந்தார். பாஜக அமைச்சரின் இந்த பேச்சுக்கு கன்னட அமைப்புகள் கண்டனம் தெரிவித்துள்ளன. இந்நிலையில், மாநிலத்திற்கு தனி கொடி இருக்கக் கூடாது என அரசியலமைப்பு சட்டத்தில் எங்கும் குறிப்பிடப்படவில்லை என்றும் அமெரிக்கா போன்ற நாடுகளில் மாநிலத்திற்கு தனி கொடிகள் உள்ளதைபோல இந்தியாவில் ஏன் இருக்கக் கூடாது எனவும் சித்தராமையா கேள்வி எழுப்பியுள்ளார். இந்த விவகாரம் சர்ச்சையை ஏற்படுத்தி உள்ளது.