தெலங்கானா மாநிலம் சென்னூர் நகரை சேர்ந்தவர் தாசரிமது. பல மாதங்களாக உடல்நலம் பாதிக்கப்பட்டிருந்த இவருக்கு, உடலில் தீய சக்தி இருப்பதாகவும் அதை வெளியேற்றினால் உடல்நிலை சரியாகும் எனவும் சாமியார் ஒருவர் கூறியுள்ளார். அதனை நம்பிய தாசரிமது குடும்பத்தார், அவருக்கு மாந்திரீக பூஜை செய்ய ஒப்புக்கொண்டனர். தொடர்ந்து கோதாவரி ஆற்றின் அருகே, அவரை அடித்து துன்புறுத்தி நிர்வாண பூஜை செய்ததாக தெரிகிறது. இதில் தாசரிமது இறந்துவிடவே, யாருக்கும் தெரியாமல் உடலை அப்புறப்படுத்த போலிச் சாமியார் திட்டமிட்டுள்ளார். இதனை தாசரிமதுவின் உறவினர் ஒருவர் ரகசியமாக படம் பிடித்து போலீசாருக்கு தகவல் கொடுத்தார். தொடர்ந்து உடலை மீட்ட போலீசார், போலிச் சாமியாரிடம் விசாரித்து வருகின்றனர்.