மக்களவைத தேர்தலுக்கான வேட்பாளர் பட்டியலை இறுதி செய்வதற்காக காங்கிரஸ் கட்சியின் மத்திய தேர்தல் குழு கூட்டம், டெல்லியில் உள்ள கட்சியின் தலைமை அலுவலகத்தில் நேற்று நடைபெற்றது. கட்சியின் தலைவர் மல்லிகார்ஜுன் கார்கே தலைமையில் நடைபெற்ற கூட்டத்தில் காங்கிரஸ் மூத்த தலைவர் சோனியா காந்தி, பொதுச் செயலாளர் கே.சி.வேணுகோபால் ஆகியோர் கலந்து கொண்டனர். ராகுல் காந்தி, குஜராத்தில் இருந்ததால் காணொளி வாயிலாக கூட்டத்தில் பங்கேற்றார். சுமார் 3 மணி நேரம் நடைபெற்ற கூட்டத்தில், டெல்லி, சத்தீஸ்கர், கர்நாடகா, தெலுங்கானா, கேரளா உள்ளிட்ட மாநிலங்களின் வேட்பாளர்கள் தேர்வு விவாதிக்கப்பட்டது. இதில், ராகுல் காந்தி வயநாடு தொகுதியிலும், சசி தரூர் திருவனந்தபுரத்திலும் மீண்டும் போட்டியிட முடிவு எடுக்கப்பட்டுள்ளதாக தகவல் வெளியாகி உள்ளது. இந்நிலையில், காங்கிரஸ் கட்சியின் முதல்கட்ட வேட்பாளர் பட்டியல் இன்று வெளியிடப்படலாம் என்று தகவல் வெளியாகி உள்ளது.