தமிழ் திரையுலகில் தற்போது ரீ-ரிலீஸ் கலாசாரம் நிலவி வருகிறது. அதன்படி, வேட்டையாடு விளையாடு, பாபா, ஆளவந்தான், விண்ணை தாண்டி வருவாயா, மயக்கம் என்ன, 3 உள்ளிட்ட படங்கள் மறுவெளியீடு செய்யப்பட்டது. குறிப்பாக கடந்த வாரம் கில்லி திரைப்படம் ரீ-ரிலீஸ் செய்யப்பட்டு ரசிகர்கள் மத்தியில் நல்ல வரவேற்பு பெற்றதுடன், சுமார் 10 கோடி ரூபாய்க்கும் மேல் வசூல் செய்ததாக கூறப்படுகிறது. அந்த வகையில், அஜித் நடிப்பில் முன்னதாக வெளியாகி வெற்றியடைந்த மங்காத்தா திரைப்படத்தை மறுவெளியீடு செய்ய வேண்டுமென ரசிகர்கள் மத்தியில் எதிர்பார்ப்பு எழுந்துள்ளது. எனினும், மங்காத்தா திரைப்படத்தை வெளிநாடுகளில் வெளியிட கையொப்பமிட்டதாக கூறப்படும் நிலையில் தமிழகத்தில் இன்னும் அது குறித்த அறிவிப்பு வெளியாகவில்லை. ஆனால், தீனா திரைப்படம் ரீ ரிலீஸ் ஆக உள்ளதாக அதிகாரப்பூர்வ அறிவிப்பு வெளியாகி உள்ளது. இது மட்டுமின்றி ரத்தினம், ஒரு நொடி உள்ளிட்ட புதிய படங்களும் 26-ஆம் தேதி வெளியாகவுள்ளதால் சினிமா ரசிகர்கள் மிகுந்த உற்சாகத்தில் உள்ளனர்.