வைகாசி விசாகத்தை முன்னிட்டு திருப்பரங்குன்றம் சுப்பிரமணிய சுவாமி கோயிலில், ஆயிரக்கணக்கான பக்தர்கள் நேர்த்திக்கடன் செலுத்தி வருகின்றனர். திருப்பரங்குன்றம் சுப்பிரமணிய சுவாமி கோயிலில், வைகாசி விசாக தினமான இன்று, அதிகாலை முதலே ஆயிரக்கணக்கான பக்தர்கள் பால்குடம் எடுத்தும், அலகு குத்தியும், காவடி எடுத்தும் தங்களது நேர்த்தி கடனை செலுத்தினர். இதனிடையே கம்பத்தடி மண்டபத்தில் எழுந்தருளிய சண்முகருக்கு பாலாபிஷேகம் நடைபெற்றது. கொரோனா பரவல் காரணமாக 2 ஆண்டுகளாக பக்தர்கள் இன்றி நடைபெற்ற வைகாசி விசாக திருவிழா, இந்தாண்டு மீண்டும் பக்தர்கள் வருகையால் களைகட்டியுள்ளது.