சென்னை படப்பை பகுதியைச் சேர்ந்த அனிதா மேரி என்ற பெண், கடந்த 2019ம் ஆண்டு சுமார் 80 ஆயிரம் மதிப்பில் புதிய பைக் வாங்கியுள்ளார். இருசக்கர வாகனம் வாங்கிய 3 மாதத்தில் பிரேக் டிஸ்க் பழுதானதால், சர்வீஸ் சென்டரில் கொடுத்து சரிசெய்துள்ளார். ஆனால், அடுத்தடுத்து 3 முறைக்கு மேல் பிரேக் டிஸ்க் பழுதானதால் மன உளைச்சலுக்கு ஆளான அவர், செங்கல்பட்டு மாவட்ட நுகர்வோர் நீதிமன்றத்தில் வழக்கு தொடர்ந்தார். இந்த வழக்கை விசாரித்த நீதிமன்றம், மனுதாரருக்கு வாகனத்தை விற்பனை செய்த ஷோரூம், சர்வீஸ் சென்டர் மற்றும் வாகனத்தின் தொழிற்சாலை இணைந்து வாகனத்தின் முழு தொகையான 80 ஆயிரம் ரூபாயும், மன உளைச்சல் ஏற்படுத்தியதற்காக ஒரு லட்சம் ரூபாயும் மற்றும் வழக்கு செலவாக 15 ஆயிரம் ரூபாய் என மொத்தமாக ஒரு லட்சத்து 95 ஆயிரம் வழங்க உத்தரவிட்டது.