அடுத்த ஆண்டு நடைபெற உள்ள மக்களவை தேர்தல் மற்றும் ஐந்து மாநில சட்டப்பேரவை தேர்தல்கள் உள்ளிட்டவற்றை கருத்தில் கொண்டு மத்திய அமைச்சரவையில் சில மாற்றங்களை செய்ய பா.ஜ.க. அரசு திட்டமிட்டுள்ளது. இதன் ஒரு பகுதியாக, கடந்த 3ஆம் தேதி மத்திய அமைச்சரவை கூடியதை தொடர்ந்து, தெலங்கானா உள்ளிட்ட நான்கு மாநில பாஜக தலைவர்கள் மாற்றப்பட்டனர். இந்த சூழலில், பிரதமர் மோடி தலைமையில் இன்று மீண்டும் அமைச்சரவை கூட உள்ளது. இந்நிலையில், வேளாண்மை, விமான போக்குவரத்து, நீர்வளம், சுற்றுச்சூழல் உள்ளிட்ட துறைகளில் அமைச்சர்கள் மாற்றப்படலாம் என தகவல் வெளியாகி உள்ளது. பர்ஃபாமன்ஸ் சரியில்லாதவர்கள், சர்ச்சைகளில் சிக்கியவர்கள் என 12 அமைச்சர்களின் பதவிகள் பறிபோகலாம் எனவும், இணை அமைச்சர்களில் சிலர் அமைச்சராகவும் ஆகலாம் எனவும் பேசப்படுகிறது. மேலும், கேரளாவில் வலுப்பெறும் நோக்கில் மலையாள நடிகர் சுரேஷ் கோபி, 'மெட்ரோ மேன்' என அழைக்கப்படும் என ஈ ஸ்ரீதரன் போன்றோருக்கு அமைச்சர் பதவி வழங்கப்படலாம் எனவும் கூறப்படுகிறது.