கனமழை காரணமாக, சென்னை போரூரில் கடும் போக்குவரத்து நெரிசல் ஏற்பட்டது. சென்னை மாநகரின் பல்வேறு பகுதிகளில் கனமழை பெய்தது. போரூர் மேம்பாலத்திலிருந்து கிண்டி செல்லும் சாலையில் ஐந்து கிலோ மீட்டர் தூரத்துக்கு கடும் போக்குவரத்து நெரிசல் ஏற்பட்டது. வாகனங்கள் ஒன்றன் பின் ஒன்றாக ஊர்ந்து சென்றதால், ஓட்டுநர்கள் சிரமத்துக்கு ஆளாகினர். இதனிடையே, போக்குவரத்தை சீர் செய்ய மாற்று பாதை அமைக்க வேண்டும் என, வாகன ஓட்டிகள் கோரிக்கை விடுத்தனர்.

ஒசூர் கெலவரப்பள்ளி அணையில் ரசாயன நுரைகள் பொங்கிச் செல்வதால், விவசாயிகள் அதிர்ச்சி அடைந்துள்ளனர். கெலவரப்பள்ளி அணைக்கு வினாடிக்கு ஆயிரத்து 99 கன அடி தண்ணீர் வந்து கொண்டிருக்கிறது. இதனிடையே, ஆறு மதகுகள் வழியாக 820 கன அடி நீர் தென்பெண்ணை ஆற்றில் வெளியேற்றப்படும் நிலையில், குவியல் குவியலாக ரசாயன நுரைகள் பொங்கிச் செல்கிறது. துர்நாற்றம் வீசி வெள்ளை நிறத்தில் பனி போர்த்தியது போல் ரசாயன நுரைகள் செல்வதால், விவசாயிகள் அதிர்ச்சி அடைந்துள்ளனர்