ராணிப்பேட்டை : ஒரே நாளில் மேலும் 109 பேருக்கு தொற்று

ராணிப்பேட்டை மாவட்டத்தில் மேலும் 109 பேருக்கு கொரோனா தொற்று ஏற்பட்டுள்ளது. இதன் காரணமாக பாதிப்பு எண்ணிக்கை இரண்டாயிரத்து 22 ஆக உயர்ந்துள்ளது. இதில் ஆயிரத்து 79 பேர் குணமடைந்து வீடு திரும்பியுள்ளனர். மேலும் 943 பேர் மருத்துவமனைகளில் சிகிச்சை பெற்று வருகின்றனர்.இந்நிலையில், நோய் தடுப்பு நடவடிக்கைகளில் மாவட்ட நிர்வாகம் மேலும் தீவிரம் காட்ட வேண்டும் என்ற கோரிக்கை  எழுந்துள்ளது.

கொரோனா பரவல் காரணமாக குடியாத்தம், பேரணாம்பட்டு ஆகிய நகராட்சி மற்றும் ஊரக பகுதிகளில் கட்டுப்பாடு விதிக்கப்பட்டுள்ளது. வரும் திங்கள் முதல் இப்பகுதிகளில் உள்ள மளிகை கடைகள், காய்கறி கடைகள் மற்றும் உணவகங்கள் காலை 6 மணி முதல் பிற்பகல் 2 மணி வரை மட்டுமே இயங்க அனுமதிக்கப்பட்டுள்ளது. மேலும் மருந்தகங்கள் மற்றும் பெட்ரோல் பங்க்குகளுக்கு  விலக்கு அளிக்கப்பட்டுள்ளது. மேலும் இன்று முழு ஊரடங்கு வழக்கம்போல் இருக்கும் என வேலூர் ஆட்சியர் சண்முகசுந்தரம் தெரிவித்துள்ளார்.

சென்னை, திருவொற்றியூர் அருகே எர்ணாவூர் சுனாமி குடியிருப்பில் காவல் துணை ஆணையர் ஆய்வு மேற்கொண்டார். மாதவரம் காவல் சரகத்திற்கு புதிதாக காவல் துணை ஆணையராக பாலகிருஷ்ணன் பொறுப்பேற்றுள்ளார். இவர், திடீரென அப்பகுதியில் உள்ள குடியிருப்பில் ஆய்வு மேற்கொண்டார். அப்போது, குடியிருப்பில் உள்ள ஒருவர் வீட்டில் நுழைந்த அவர், வீட்டில் உள்ளவர்களிடம் நலம் விசாரித்தார். 

நாமக்கல் மாவட்டம் திருச்செங்கோடு பகுதியில் கொரோனா தொற்று காரணமாக உயிரிழந்தவரின் உடலை வருவாய் மற்றும் சுகாதாரதுறை அதிகாரிகள் நல்லடக்கம் செய்தனர். குமாரபாளையம் பகுதியைச் சேர்ந்த 58 வயது பெண் கொரோனா தொற்று காரணமாக உயிரிழந்துள்ளார். அவர் உடலை பெருந்துறை பகுதியில் அடக்கம் செய்ய எதிர்ப்பு தெரிவித்த நிலையில், தட்டாங்குட்டை மயானத்தில் அடக்கம் செய்தனர்.