குடியுரிமை திருத்த சட்டத்திற்கு எதிர்ப்பு : என்.ஆர்.சி, என்.பி.ஆரை திரும்பப் பெற கோரிக்கை

திமுக கூட்டணி மற்றும் இஸ்லாமிய அமைப்புகள் சார்பில்​நெல்லையில் மனித சங்கிலி போராட்டம் நடைபெற்றது. இதில் பங்கேற்ற ஆயிரக்கணக்கானோர்,  குடியுரிமை திருத்த சட்டத்திற்கு எதிரான பதாகைகளுடன், கண்டன முழக்கங்களை எழுப்பினர்.

தேனி மாவட்டம் கம்பத்தில், தமிழக மக்கள் ஒற்றுமை மேடை சார்பில், மனிதசங்கிலி போராட்டம் நடைபெற்றது. இதில் பங்கேற்றவர்கள், சிஏஏ, என்பிஆர், என்ஆர்சியை வாபஸ் பெறக்கோரி முழக்கங்களை எழுப்பினர். இதேபோல,  உத்தமபாளையம், கூடலூர் உள்ளிட்ட பகுதிகளிலும்,  மனிதசங்கிலி போராட்டம் நடத்தப்பட்டது.

பாப்புலர் பிரண்ட் ஆப் இந்தியா அமைப்பு சார்பில், திருப்பூர் மாநகராட்சி அலுவலகம் முன்பு, கண்டன ஆர்ப்பாட்டம் நடைபெற்றது. மெழுகுவர்த்தி ஏந்தியபடி, இதில் பங்கேற்ற ஏராளமானோர், தேசிய மக்கள் தொகை பதிவேடு, தேசிய குடிமக்கள் பதிவேடு மற்றும் குடியுரிமை திருத்த சட்டத்தை திரும்பப் பெற வலியுறுத்தினர்.

இதேபோல, காரைக்கால் கோவில்பத்து பழைய ரயிலடி பகுதியில் நடைபெற்ற ஆர்ப்பாட்டத்தில் பங்கேற்ற இஸ்லாமியர்கள், மெழுகுவர்த்தி ஏந்தியபடி, குடியுரிமை திருத்த சட்டத்திற்கு எதிராக கண்டன முழக்கங்களை எழுப்பினர்.

ஸ்ரீவில்லிபுத்தூரில், நடந்த ஆர்ப்பாட்டத்தில் 200க்கும் மேற்பட்ட இஸ்லாமியர்கள் பங்கேற்றனர்.  மெழுகுவர்த்தி ஏந்தியபடி, சிஏஏவுக்கு எதிரான பதாகைகளை ஏந்தியபடி  போராட்டத்தில் ஈடுபட்டனர்.