காபி கோப்பை, பென் டிரைவில் கட்சி சின்னங்கள்...

விறுவிறுப்பாக தொடங்கிவிட்டது தேர்தல் திருவிழா. பிரசாரங்களில் மும்முரம் காட்டி வருகின்றன கட்சிகள். இதற்கு பின்னால் கொடிகள், தோரணங்கள், தொப்பிகள் என பெரிய அளவிலான வர்த்தகம் நடந்து வருகிறது. முன்பெல்லாம்,  சின்னங்களை மக்களிடம் கொண்டு செல்ல சுவரெழுத்து, போஸ்டர், கொடிகள், பேட்ஜ்கள் மட்டும்தான் பிரதானமாக இருந்தன. அதற்கு பின்னர் தொப்பி,  டி சார்ட், சாவிக் கொத்து, கார், பைக் ஸ்டிக்கர்கள் போன்றவை மூலமாக கொண்டு வரப்பட்டன. ஆனால் அவை எல்லாம் பழைய முயற்சிகள் என்று சொல்வதற்கு ஏற்ப, தற்போது காபி கோப்பை , பென் டிரைவ்,  பவர் பேங்க், கை பாண்டுகள் போன்ற  ஹை டெக் உபகரணங்கள் மூலமும் சின்னங்கள் கொண்டு செல்லப்படுகின்றன. புடவைகள், ஜாக்கெட்டுகளிலும் தலைவர்களில் படங்கள் இடம்பெற்றுவிட்டன. மோடி, பிரியங்கா , இந்திரா காந்தி போன்ற தலைவர்களின் புகைப்படங்கள், கட்சி சின்னங்கள் அச்சிடப்பட்ட புடவைகள் தேர்தல் நேரத்தில் அதிகமாக விற்பனை ஆகின்றன.

பாஜக , காங்கிரஸ், சமாஜ்வாதி கட்சி, ஆம் ஆத்மி, தெலுங்கு தேசம் உள்ளிட்ட கட்சிகள் அதிக அளவில் கொள்முதல் செய்கின்றன. திமுக அதிமுகவும் அதிக அளவில் கொள்முதல் செய்யும் வரிசையில் இருக்கின்றன. நமோ செயலி மூலமும் பிஜேபி விற்பனை செய்து வருகிறது. தேர்தல் கால பிரசாரத்துக்கு ஏற்ப  செளகிதார் என்று அச்சிடப்பட்ட பனியன்களும், தொப்பிகளும் விற்பனைக்கு வந்துள்ளன.  பரிசுப்பெட்டி சின்னம் அறிவிக்கப்பட்ட அன்று மதியமே பரிசுப் பெட்டி மாடல்கள் தமிழக வாக்காளர்களுக்கு கொண்டு செல்லப்பட்டன. ஆந்திரா, தமிழ்நாடு, மகாராஷ்டிர மாநிலங்களில், கட்சிகளின் சின்னம் கொண்ட  கார், பைக் ஸ்டிக்கர்கள், வாட்டர் பாட்டில், டி சார்ட், தொப்பி ஆகியவற்றுக்கு அதிக தேவைகள் உள்ளதாக வர்த்தகர்கள் கூறுகின்றனர். 

இந்த பொருட்கள் அனைத்தும், கட்சி அலுவலகங்களைத் தாண்டி, வெளிச் சந்தைகளிலும் விற்பனைக்கு கிடைக்கின்றன. இப்போது, அமேசான், பிளிப்கார்ட் என ஆன்லைன் சந்தைகளிலும் வாங்கலாம் என்கிற அளவுக்கு சந்தை விரிவடைந்துள்ளது. கட்சிகளின் ஆர்டர்களுக்கு ஏற்பவும்,  விற்பனை எதிர்பார்ப்பு காரணமாகவும் இவை தயாராகின்றன. கட்சி அனுதாபிகளுக்கு இவை உணர்வு சார்ந்த விஷயம். வர்த்தகர்களுக்கு  தீபாவளி, பொங்கல் பண்டிகை காலம்போல  இதுவும் ஒரு சீசன் காலம்.