350 கி.மீ தூரத்தை 4 மணி நேரத்தில் கடந்த ஆம்புலன்ஸ்
திருச்சி தனியார் மருத்துவமனையில், இதய கோளாறுடன் பிறந்த குழந்தை, சிகிச்சைக்காக, நான்கு மணி நேரம், 10 நிமிடங்களில், சென்னை அப்பல்லோ மருத்துவமனைக்கு ஆம்புலன்ஸ் மூலம் கொண்டு வரப்பட்டது.
குறிப்பிட்ட நேரத்திற்குள் குழந்தையை சென்னைக்கு, கொண்டு செல்ல வேண்டும் என, மருத்துவர்கள் அறிவுறுத்தியதால், ஜி.என்.ஆர்.ஆம்புலன்ஸ் மீட்புக் குழுவினர் அதற்கான பணிகளில் களம் இறங்கினர். அதன்படி திருச்சியில் இருந்து சென்னை வரை திருச்சி - சென்னை தேசிய நெடுஞ்சாலையில் 15 க்கும் மேற்பட்ட ஆம்புலன்ஸ்கள் தயார் நிலையில் இருந்தன. திருச்சியில் இருந்து குழந்தையை ஏற்றி கொண்டு ஆம்புலன்ஸ் புறப்பட, அதற்கு முன்னதாக வாட்ஸ் அப்பில் ஒருங்கிணைந்து , சுமார் 15 க்கும் மேற்பட்ட ஆம்புலன்ஸ்கள் ஆங்காங்கே நின்று குழந்தை வந்த ஆம்புலன்சுக்கு முன்னே சென்று போக்குவரத்தை சரி செய்த படியே சென்றன. இதனால், 350 கிலோ மீட்டர் தூரத்தை, போக்குவரத்து நெரிசல் மிகுந்த சென்னையை 4 மணி நேரம் 10 நிமிடத்தில் ஆம்புலன்ஸ் கடந்து சென்றது. உரிய நேரத்தில், சிகிச்சைக்காக, குழந்தை அனுமதிக்கப்பட்டதற்கு, ஆம்புலன்ஸ் ஓட்டுனர் மற்றும் அவசர கால மருத்துவ நிபுணர் ஆகியோருக்கு பாராட்டுக்கள் குவிந்த வண்ணம் உள்ளன.
Next Story
