முதல்வராக பதவியேற்றார் புபேந்திர பாய் படேல் -அமைச்சரவை பட்டியல் விரைவில் வெளியாகும்

குஜராத்தின் 17 வது முதல்வராக புபேந்திரபாய் ரஜினிகாந்த் பட்டேல் பதவியேற்றுள்ளார்.அகமதாபாத்தில் உள்ள ஆளுநர் மாளிகையில் எளிமையாக நடைபெற்ற விழாவில் ஆளுநர் ஆச்சார்ய தேவ்ரத் புபேந்திர பாய் பட்டியலுக்கு பதவி பிரமாணம் செய்து வைத்தார். இந்த விழாவில் மத்திய உள்துறை அமைச்சர் அமித் ஷா, மத்திய அமைச்சர்கள் நரேந்திர சிங் தோமர்,பிரல்ஹாத் சிங் ஜோஷி, துணை முதல்வராக இருந்த நிதின் படேல், மாநில பாரதிய ஜனதா தலைவர் சி.ஆர். பாட்டீல், ஹரியானா முதல்வர் மனோகர் லால் கட்டார் மத்திய பிரதேச முதல்வர் சிவராஜ் சிங் சவுகான், கர்நாடக முதல்வர் பசவராஜ் பொம்மை உள்ளிட்ட தலைவர்கள்  பலர் கலந்து கொண்டனர். முதல்வராக பதவியேற்ற புபேந்திர பட்டேலுக்கு உள்துறை அமைச்சர் அமித் ஷா பூங்கொத்து கொடுத்து வாழ்த்து தெரிவித்தார்.புபேந்திர பட்டேலின் தலைமையிலான அமைச்சரவையில் இடம்பெறும் புதிய அமைச்சர்கள் குறித்த அறிவிப்பு ஓரிரு நாளில் வெளியிடப்படும் என்று எதிர்பார்க்கப்படுகிறது. முதல்வராக பதவியேற்பதற்கு முன்பாக முன்னாள் முதல்வர் விஜய் ரூபாணி மற்றும் துணை முதல்வர் நித்தின் பட்டேல் ஆகியோரை மரியாதை நிமித்தமாக சந்தித்து புபேந்திர பட்டேல் வாழ்த்து பெற்றார்.