விளையாட்டு திருவிழா - 12.09.2018 - கடைசி டெஸ்ட்டில் இந்தியா தோல்வி - ராகுல், பந்த் ஆகியோரின் சதம் வீண் ; பேட்ஸ்மேனாக வெற்றி பெற்ற கோலி

லண்டன் ஓவல் மைதானத்தில் நடைபெற்ற கடைசி டெஸ்ட்டில் இங்கிலாந்து 332 ரன்களும், இந்தியா 292 ரன்களும் எடுத்தன. 40 ரன்கள் முன்னிலை பெற்ற இங்கிலாந்து அணி, 2வது இன்னிங்சில் 8 விக்கெட் இழப்பிற்கு 423 ரன்கள் சேர்த்தது. 464 ரன்கள் எடுத்தால் வெற்றி என்ற கடினமான இலக்குடன் இந்தியா களமிறங்கியது. தவான், கோலி, புஜாரா, ரஹானே, ஆகியோர் சொற்ப ரன்களில் ஆட்டமிழக்க இந்திய அணியில் தோல்வி உறுதியானது. இந்த நிலையில் தான் ஜோடி சேர்ந்த கே.எல்.ராகுல் , ரிஷப் பந்த் தங்களது பொறுப்பான ஆட்டத்தின் மூலம் இந்திய அணி ரசிகர்களுக்கு நம்பிக்கை அளித்தனர். ஒருநாள் போட்டி பாணியில் விளையாடிய இந்த ஜோடி அடுத்தடுத்து சதம் விளாசினர். ஒரு கட்டத்தில் இந்தியா டிரா செய்யுமா என்று எதிர்பார்த்த ரசிகர்கள், இவர்கள் ஆட்டத்தை பார்த்து வெற்றி பெற்றுவிடுவோம் என்ற நம்பிக்கையாக இருந்தனர். 5 விக்கெட் இழப்பிற்கு 121 ரன்கள் என்ற ஸ்கோரில் சேர்ந்த இந்த ஜோடி அணியின் ஸ்கோரை 325 வரை உயர்த்தியது. இந்த நிலையில் ஆட்டத்தில் திருப்புமுனை ஏற்பட்டது. 149 ரன்கள் எடுத்த போது ரஷித் பந்துவீச்சில் கே.எல். ராகுல் போல்ட் ஆகினார். இவரை தொடர்ந்து தேவையில்லாத ஷாட் ஆடி ரிஷப் பந்த்தும் ஆட்டமிழக்க, இந்திய ரசிகர்களின் நம்பிக்கை சுக்கு நூறாக உடைந்தது. ஆட்டத்தை ஜடேஜா சமன் செய்வார் என்று எதிர்பார்த்த நிலையில், அவரும் பெவிலியன் திரும்ப, இந்தியாவின் தோல்வி தவிர்க்க முடியாமல் போய் விட்டது. இந்திய அணிக்கு நம்பிக்கை அளிக்கும் விதமாக நடந்த ஒரே விஷயம்,  கே.எல்.ராகுல், ரிஷப் பந்த்தின் ஆட்டம் மட்டும் தான். இங்கிலாந்து ரசிகர்களிடமிருந்து கண்ணீர் மல்க ஆட்டநாயகன் விருதுடன் குக் விடைபெற்றார்.இங்கிலாந்து மண்ணில் ஆட தெரியாது என்று கேலி பேசியவர்களுக்கு தொடர் நாயகன் விருது மூலம் கோலி பதில் அளித்தார். மேலும், டெஸ்ட் போட்டியில் அதிக விக்கெட்டுகள் வீழ்த்திய வேகப்பந்துவீச்சாளர் என்ற சாதனையை ஆண்டர்சன் படைத்தார்.

CLIF DIVING...  உச்சியிலிருந்து தண்ணீருக்குள் டைவ் அடிப்பதே இந்த விளையாட்டாகும். குறிப்பிட்ட உயரத்தில் நிற்கும் வீரர்கள் , தண்ணீரில் குதிக்கும் போது , உருண்டு கொண்டே விழுவார்கள். வீரர்கள் குதிக்கும் போது எந்தளவிற்கு சாகசம் மேற்கொள்கிறார்களோ, அத்ன் அடிப்படையில் நடுவர்கள் புள்ளிகளை வழங்குவார்கள். இதனை அடிப்படையாக வைத்தே வெற்றியாளர்களை தேர்வு செய்வார்கள். குதிக்கும் போது கொஞ்சம் குறித் தவறினாலோ,  உயிர் நமது கையில் இல்லை. இந்த விளையாட்டில் பல விபத்துகளும் நிகழ்ந்து வீரர்கள் உயிரை விட்டுள்ளனர். சாகச அடிப்படையிலான இந்தப் போட்டி ஆண்கள் மட்டும் விளையாடுவதில்லை. பெண்களும் ஆண்களுக்கு நிகராக ஜொலித்து உள்ளனர். அமெரிக்க, ஐரோப்பிய நாடுகளில் பிரபலமாக உள்ள இந்த விளையாட்டு சாகச அடிப்படையில் கொண்டது. சமீபத்தில் போஸ்னியாவில் நடைபெற்ற இந்தப் போட்டியில் ஆடவர் பிரிவில் பிரிட்டன் வீரர் GARY யும், மகளிர் பிரிவில் ஆண்டிரியானா சாம்பியன் பட்டத்தை வென்றனர்.