"ஸ்புட்னிக் - வி" தடுப்பூசி உற்பத்தியை உயர்த்த திட்டம்

இந்தியாவில் கோவேக்சின் மற்றும் கோவிஷீல்டு ஆகிய இரண்டு தடுப்பூசிகள் கொரோனாவுக்கு எதிராக பயன்படுத்தப்பட்டு வருகின்றன. இருப்பினும், இந்தியாவில் கடந்த சில வாரங்களாக கொரோனா பரவல் மீண்டும் அதிகரித்து வருகிறது. இந்நிலையில், அவசர கால பயன்பாட்டுக்கு, ரஷ்யாவின் ஸ்புட்னிக்-வி கொரோனா தடுப்பூசியை பயன்படுத்த இந்திய மருந்து கட்டுப்பாட்டு இயக்குனரகம் அனுமதி அளித்துள்ளது.

பல்வேறு நாடுகளில் ஸ்புட்னிக்-வி தடுப்பூசிக்கு அனுமதி வழங்கப்பட்டுள்ள நிலையில், 60 வது நாடாக இந்தியாவில் அனுமதி வழங்கப்பட்டுள்ளது. புகழ்பெற்ற மருந்து உற்பத்தி நிறுவனமான ரெட்டிஸ் நிறுவனத்துடன் இணைந்து ஸ்புட்னிக்-வி தடுப்பூசி உற்பத்தியை அதிகரிக்க ரஷ்யா முடிவெடுத்து உள்ளது. கிளாண்ட் பார்மா, பனாசியா பயோடெக் உள்ளிட்ட பல நிறுவனங்களுடனும் தடுப்பூசி தயாரிக்க ஒப்பந்தம் மேற்கொள்ளப்பட்டுள்ளது.

இதன்மூலம், ஆண்டுக்கு 85 கோடி தடுப்பூசியை உற்பத்தி செய்ய திட்டமிடப்பட்டு உள்ளது. ஸ்புட்னிக்-வி தடுப்பூசியை சேமிக்க பிரத்யேக குளிர்பதன கட்டமைப்பு தேவைப்படாது என்றும், 2 முதல் 8 டிகிரி செல்சியஸ் வெப்பநிலையில் சேமித்து வைக்க முடியும் என்றும் கூறப்படுகிறது.  ஸ்புட்னிக்-வி தடுப்பூசியின் விலை 800 ரூபாய்க்கும் குறைவான விலையில் கிடைக்கும் என்றும், விரைவில் மக்கள் பயன்பாட்டுக்கு வரும் என்றும் எதிர்பார்க்கப்படுகிறது.